Konstrusaun Edifísiu TJPID Atinje 95%

Hatutan.com, (09 Novembru 2023) Díli—Progresu konstrusaun Tribunál Judisiál Primeira Instánsia Díli (TJPID) atinje ona 95%. Nune’e, iha tinan oin 2024  bele ona halo inaugurasaun.

Lee Mós: Estensaun Dala-tolu no Pagamentu Millaun $3-resin, Konstrusaun Edifísiu TJPID Foin Atinje 67,70%

Projetu Edífisiu foun Tribunál Judisiál Primeira Intánsia Díli. Foto/Dok. Hatutan.com

Prezidente Tribunál Rekursu (PTR),  Deolindo dos Santos, hateten konstrusaun Tribunál Judisiál Primeira Instánsia ne’e atraza tebes, tanba ne’e  nia parte hala’o ona sorumutuk ho kompañia ne’ebé mak manan projetu ne’e atu bele aselera obra ne’e finaliza iha fulan-Dezembru.

“Ita halo esforsu para bele hotu iha fulan-Dezembru nia laran. Hakarak ka lakohi fulan-Dezembru tenke finaliza ona. Agora atinje ona 94 ka 95%,” PTR Deolindo dos Santos hateten  bá jornalista sira, iha edifísiu Ministériu Finansa, Díli, Kinta (09/11/2023).

Nia hateten, obra ne’e atrazu tuir razaun hosi empreza kontraktor Xina Shadong International Economic and Tevhnical Cooperation Group R.P,   katak dezeñu ne’ebé mak  halo ne’e dala barak mai ho defeitu rasik ne’ebé presiza korresaun,   obra ne’e komesa hosi pandemia Covid-19 ne’ebé prozudika mobiliza nesesidade ka materiál hosi rai-li’ur mai Timor-Leste, no obra ne’e hetan supervizaun ka kontrolu hosi Ministeriu Obras Publika, Komisaun Nasionál Aprovizionamentu  (CAN) ho  Ajénsia Dezenvolvimentu Nasionál (ADN) atu bele garante nia kualidade.

Projetu konstrusaun Tribunál Judisiál Primeira Instánsia Díli hahú iha loron 25 fulan-Novembru 2020, ne’ebé hetan supervizaun konsultóriu husi kompañia Decrea in association with AEC no kontraktor husi kompañia Xina Shadong International Economic and Tevhnical Cooperation Group R.P ho valor projetu $10.990.769,35

Jornalista : Leopoldina de Carvalho