Eleisaun Suku Segunda Volta iha Fatuhada La’o Di’ak

Hatutan.com (13 Novembru 2023), Díli – Eleisaun segunda volta  órgaun suku nian iha Suku Fatuhada, Postu Administrativu Dom Aleixo, Munisípiu Díli, la’o di’ak kompara ho eleisaun primeira volta.

Lee Mós: Prezidente Repúblika Sei Organiza Enkontru ho Xefe Suku Eleitu sira

Eleisaun segunda volta  órgaun suku nian iha Suku Fatuhada, Postu Administrativu Dom Aleixo, Munisípiu Díli, Segunda (13/11/2023). Foto/Elio dos Santos da Costa

“Ohin ne’e di’ak liu tanba ita hili ita-nia kandidatu xefe suku sira ne’ebe mak iha ne’e kapás liu no mós rápidu kompara ho eleisaun foin liubá,” Filomena Orleans de Araújo, nu’udár eleitór haktuir bá jornalista sira iha Suku Fatuhada, Segunda (13/11/2023).

Iha foin lalais eleisaun primeira volta, Filomena Orleans de Araújo, dehan  ema barak no mós atrapalla ho situasaun sena-malu hodi prejudika eleisaun la’o ladún di’ak no Xefi Aldeia no delegadu ho delegada sira ne’e vota ne’e kleur tamba se hakerek nune’e atraza liu no hamosu forma naruk no kleur ba eleitór sira.

“Ha’u haree sistema ida agora ne’e kapás loos no ita mai mós livre loos no la iha buat ruma atu interrompe ita,” Filomena Orleans de Araújo hateten.

Iha fatin hanesan prezidente  meza eleisaun segunda volta órgaun suku Fatuhada,  Ana Cristina Ataide do Rego, hateten komesa tuku 9:00 Otl, eleitór sira mai partisa ho másimu no situasaun no sistema la’o di’ak tanba iha kandidatu na’in-rua de’it ne’ebé lalais de’it.

“Eleisaun bá segunda volta ne’e di’ak tamba dezde hahú loke iha sentru votasaun la iha ema ida mak forma iha liña. Ida mai ezerse kedan nia direitu votu sai bá liu,” Ana Cristina Ataide do Rego haktuir.

Kandidatura xefe suku Fatuhada  na’in-rua ne’ebé avansa bá eleisaun suku segunda volta mak Marcelino Soares ho numeru soretiu (1) no Sergio da Silva Moreira ho númeru sorteiu (2).

Suku Fatuhada iha aldeia lima mak hanesan: Zero I, Zero II, Zero III, Zero IV, Zero V.Tuir observasaun Hatutan.com katak iha Sentru Votasaun Eleisaun Órgaun Suku la’o di’ak tebes no hetan seguransa másimu hosi Polísia Nasional Timor Leste (PNTL)

Jornalista Estajiáriu : Lazaro Pereira Quefi