Grupu Dansa Tradisionál 11 Hosi Indonézia-TL Sei Harame Festivál Fronteira 2023

Hatutan.com (14 Novembru 2023), Díli— Festivál Fronteira 2023 sei partisipa hosi grupu Tradisionál hamutuk haat (4) mai hosi Nusa Tengara Timur (NTT), Repúblika Indonézia, no grupu hitu (7) seluk mak Timor-Leste nian ne’ebé sei hatudu sira-ninian dansa tradisionál no kulturál, hodi harame eventu ne’e hahú hosi loron 15 to’o 18, fulan-novembru tinan ne’e.

Ambiente fatin festival 2023, iha kampu futeból, suku Ramaskora, Postu Administrativu Maliana Vila, Munisipiu Bobonaro, Segunda (14/11/2023). Foto: CNC.

Ajenda atividade ne’ebé Hatutan.com asesu, Grupu Dansa Tradisionál sira ne’e mai hosi Munisipiu Bobonaro, Rejiaun Administrativa Espesiál Ocusse Ambeno (RAEOA), Munisipiu Covalima, Dansa hosi Malaka, Belu, Kefa NTT. Hosi Timor Leste nian sei partisipa hosi grupu Sangar St. António, Timor Furak, Wehale, Lejiaval,  Fraternal no seluk tán.

Lee Mós: Governu Sei Gasta $74.055 bá Festivál Fronteira, Interkámbiu Kulturál no Promove Rekonsiliasaun

Governu liuhosi Sekretaria Estadu Arte no Kultura (SEAK) no Centro Nacional Chega! (CNC), inklui Governandór Nusa Tengara Timur (NTT) sai hanesan uma-na’in bá realizasaun eventu nasionál Festivál Fronteira 2023.

Tuir ajenda,  iha loron kuarta 15 novembru 2023 nian mak hanesan, serimónia simu matak malirin, inaugurasaun monumentu liberdade, vizita sítiu istóriku no kulturál.

Observasaun direta Hatutan.com iha terrenu nota katak, komisaun organizadora prepara nafatin hela fatin bá serimónia. Grupu artezenatu sira lori ona sasan bá tau iha fatin sira fa’an produtu nian ne’ebé MTKI prepara ona.

Festival Fronteira ne’e, ho tema ‘interkámbiu kulturál, promove Rekonsíliasaun’, entre timoroan sira ne’ebé uluk situasaun konflitu, halai sai hosi TL bá NTT.

Jornalista: Rogério Pereira Cárceres