Maioria Populasaun Manufahi ho Covalima Asesu Bee-Moos

Hatutan.com, (14 Novembru 2023), Díli– Iha fiskalizasaun Komisaun E Parlamentu Nasionál bá asuntu Infra-estrutura, nota katak maioria populasaun iha Munisípiu Manufahi ho Covalima asesu ona bee-moos ho di’ak.  

Lee Mós: Governu Estabelese Koordenasaun Servisu Interministeriál Solusiona Jestaun no Fornesimentu Bee-Moos bá Povu

Labarik ida halimar hela bee-moos. Foto/Espesiál

“Ami foin bá halo fiskalizasaun iha Munisípiu balu, maka hanesan iha Munisípiu Manufahi laiha preokupasaun bee-moos tanba Munisípiu Manufahi bee barak entaun sira nian persentajen ki’ik liu ne’ebé seidauk asesu bá bee-moos, agora oinsá para Governu bele kanaliza bee-moos bá fatin área remota sira ne’e. Tuir fiskalizasaun komisaun E iha Suai-Covalima  mós iha bee-matan lubun boot iha ne’ebá, agora oinsá IX Governu nian programa para  bele dada bee-moos bá ita nian populasaun sira to’o área remota,” Prezidente Komisaun E PN,  Marcos Xavier bá Hatutan.com iha PN, Tersa  (14/11/2023).

Prezidente komisaun E deputadu Marcos Xavier mós husu bá komunidade sira labele sunu rai atu nune’e labele fó impaktu bá bee.

“Ita ko’alia kona-bá bee-moos ita-boot sira mós hatene agora ne’e bailoron naruk, ita nia bee-matan balu mós komesa maran, entaun oinsá maka ita atu hadi’a bee ne’e maka, primeiru tenke  fila-fali bá komunidade sira labele sunu rai, tanba sé sunu rai  impaktu ne’e bá iha bee-matan sira ne’e bele maran,” deputadu Marcos Xavier  hateten.

Deputadu hosi Bankada CNRT husu komunidade sira pasiénsia no sei rezolve problema bee-moos iha komunidade nian leet durante mandatu IX Governu Konstitusionál ne’ebé lidera hosi Primeiru-Ministru Kay Rala Xanana Gusmão.

Prezidente komisaun E ne’e mós haktuir tan katak planu sira ne’e iha hotu ona hein orsamentu jerál estadu (OJE) 2024 aprova bele rezolve ona problema bee-moos iha territóriu nasionál

Jornalista Estajiária : Zita Menezes