Semana ne’e, Pasaporte 16.000 To’o TL

Hatutan.com (15 Novembru 2023), Díli—Minsitériu Justisa (MJ) liu hosi Servisu Rejistu Notariadu fó-sai katak, iha semana ne’e nia laran pasaporte hamutuk 16.000 to’o Timor Leste (TL) no sei fó prioridade bá ema ne’ebé presiza urjente.

Pasaporte komún ho pasaporte servisu RDTL . Foto/Hatutan.com.

“Minsitériu Justisa hakarak informa bá Timoroan no públiku katak, iha semana ida-ne’e nia laran, sei simu segunda parsela hosi kaderneta pasaporte eletróniku ho totál rihun sanolu resin-neen,” Hatutan.com sita komunikadu, Kuarta (15/11/2023).

Lee Mós: Rezolve Pasaporte, Ministru Amándio Promete Fim Setembru Maibé Xanana dehan La Fásil

Tanba ne’e, Minsitériu Justisa liu hosi Servisu Rejistu Notariadu hotu-hotu iha munisípiu inklui RAEOA sei hahú atendimentu normál bá sidadaun hotu iha loron 22 fulan Novembru 2023, relasiona ho prestasaun servisu públiku hodi hatán bá pasaporte tipu komún.

Ministeriu Justisa mós husu deskulpa no komprensaun bá sidadaun sira kona-bá inkoveniente hirak ne’ebé akontese tanba falta dokumentu ofisiál ida-ne’e, ne’ebé mosu ho razaun oi-oin. 

Targa ne’e defísil atu haruka mai Timor tanba laiha aviaun kargueiru, nune’e tenke uza fali remesa liu hosi aviaun komersiál, maibé tanba kapasidade volume karga refere boot liu no susar atu haruka dala ida de’it, entaun volume boot nune’e tenke fahe-fali atu bele liu hosi aviaun komersiál.

Ekipa MJ iha dedikasaun no halo esforsu atu rezolve problema ne’e ho lalais no liu hosi autoridade Timoroan nian iha  rai li’ur, husu no rezolve ona problema aviaun no asegura katak, karga sei entrega ho efisiénsia másima.

Jornalista: Gloria Maia