2024, MOP Sei Rezolve Eletrisidade Mate-Lakan no Estrada

Hatutan.com (16 Novembru 2023) Díli— Ministru Obras Públika (MOP), Samuel Marçal, promete katak iha tinan 2024 ministériu ne’e sei rezolve problema eletrisidade ne’ebé mate lakan no mós problema estrada ku’ak iha Díli to’o munisípiu.

Tékniku EDTL,E.P hadi’a liña distribuisaun eletrisidade. Foto/Hatutan.com

“Planu MOP nian ba Orsamentu 2024 maka sei rezolve problema eletrisidade mate lakan, estrada iha nasionál, kanalizasaun bee-moos ba suku sira ne’ebé sei hasoru problema no identifika bee matan ne’ebé di’ak hodi bele halo kanalizasaun,” Samuel Marçal hateten iha salaun Nobre MNEK, Pantai Kelapa, Kinta (16/11/2023).

Lee Mós: Kondisaun Estrada, Bee-Moos ho Eletrisidade Difikulta Atividade Povu Ataúro

Samuel Marçal rekoñese katak, estrada ku’ak barak iha Díli laran impaktu hosi servisu Bee Timor-Leste, Empresa Públika (BTL.EP) ne’ebé kee rai hodi halo kanalizasaun bee moos bá komunidade.

Tanba ne’e Ministru iha ona komunikasaun ho parte BTL.EP atu bele halo liña koordenasaun bainhira atu kee estrada hodi halo kanalizasaun bee moos ka atu harii rin eletrisidade.

“Ida ne’e akontese uluk kedan. Ha’u mós halo enkontru ona ho BTL.EP ho parte estrada nian atu servisu hamutuk se la’e ida bá kee, ida ba taka afinál ami Ministériu ida de’it,” Samuel Marçal hateten.

Daudaun ne’e esforsu ne’ebé nia parte halo maka oinsa halo estudu komparativu iha nasaun avansadu sira atu hetan materiál ida ne’ebé di’ak no barratu hodi utiliza ba rezolve estrada sira ne’ebá aat iha urbana.

Samuel Marçal mós orienta ona tékniku bá iha konsultór sira atu halo re-dezeñu bá estrada urbana sira iha sidade Díli, nune’e iha 2024 bele tau alkatraun hodi evita rai-rahun.

Jornalista: Leopoldina de Carvalho