Governu Aprova Projetu Dekretu Lei Rejistu Embarkasaun Nasionál Tuir Padraun Internasionál Seguransa Marítima

Hatutan.com (18 Novembru 2023) Díli—Governu aprova ona projetu Dekretu-Lei, kona-bá Rejistu Embarkasaun no Ró no Servisu Inspesaun Téknika ba Ró, ne’ebé estabelese norma, prosedimentu rejistu no servisu inspesaun ba utilizasaun ró no embarkasaun nasionál, tuir padraun internasionál seguransa marítima no protesaun ambiente mariñu (tasi) nian.

Ró NRTL Kay Rala Xanana atraka hela iha Portu Díli. Foto/Cipriano Colo.

Projetu Dekretu-Lei ne’e aprezenta hosi Ministru Transportes no Komunikasaun (MTK), Miguel Marques Gonçalves liu hosi Reuniaun Konsellu Ministru (KM) estraordináriu iha Palásiu Governu Díli, Sábadu, 18 Novembru 2023.

Lee Mós: Ró Berlin Nakroma Bá Ona Halo Manutensaun iha Indonézia

“Diploma ne’e kona-bá Rejistu Embarkasaun no Ró sira, ninia objetivu atu estabelese no regula rekizitu no prosedimentu sira ne’ebé sai hanesan baze ba atribuisaun nasionalidade timoroan bá embarkasaun no ró sira no direitu konsekuente, hodi hasa’e bandeira timoroan nian ba ró sira ne’e, nune’e mós hodi kria no regula sira-nia rejistu,” Hatutan.com sita komunikadu.

Projetu Dekretu-Lei kona-bá Servisu Inspesaun Téknika ba Ró sira, ho ninia objetivu prinsipál atu garante seguransa navegasaun iha marítima jurisdisaun Repúblika Demokrátika Timor-Leste nian no hodi prezerva meiu ambiente tasi nian.

Ho dalan ida ne’e, hakarak atu estabelese norma no prosedimentu ne’ebé vigora ba atividade kontrolu no inspesaun téknika ró sira no sira-nia ekipamentu.

Projetu Dekretu-Lei ne’e mós hakarak atu regulamenta sertifikasaun no akreditasaun inspetór sira, asegura prevensaun asidente navegasaun tuir norma internasionál Konvensaun Nasoins Unidas nian kona-ba Direitu Tasik (SOLAS), ne’ebé Timor-Leste sai hanesan signatáriu.

Jornalista: Gloria Maia