Trata Pasaporte, Kada Loron Atende Ema Na’in 140

Hatutan.com (20 Novembru 2023), Díli—Minsitériu Justisa (MJ) liu hosi Diresaun Nasionál Servisu Rejistu Notariadu (DNSRN) sei hahú hala’o atendimentu bá sidadaun ne’ebé hakarak trata pasaporte iha 22 Novembru 2023, kada loron atende ema na’in 140.

Diretór Diresaun Jerál Servisu Rejistu Notariadu (DJSRN) João Fernando Martins Borges. Foto/Rogério Pereira Cárceres

Diretór Jerál Servisu Rejistu Notariadu, João Fernando Martins Borges informa, atendimentu públiku ba trata pasaporte ne’e sei hahú ho abitante na’in 140 neebé kompostu hosi adultu feto na’in 50, adultu mane na’in 50, labarik 15, idozu 15 inklui ema ho defisiénsia na’in 10.

Lee Mós: 22 Novembru, Atendimentu Públiku bá Trata Pasaporte Maibé Balun Hahú Hein iha Edifísiu Servisu Rejistu Notariadu

“Hosi númeru sidadaun sira ne’e, la-inklui pedidu ofisiál sira ne’ebé mai hosi instituisaun sira. 140 ne’e bá de’it atendimentu públiku kada loron. Iha munisípiu sira sei fó kompeténsia bá diretór munisipál sira atu jere atendimentu,” João Fernando Martins Borges hateten iha knaar fatin, Segunda (20/11/2023).

Atendimentu iha munispiu sira mós sei la’o normál iha loron 22 Novembru ne’e atu evita konsentrasaun populasaun mai iha nasionál no funsionariu kada munispiu hala’o knaar hodi halo mós atendimentu.

“La signfika pasaporte imprime iha kada munispiu, maibé pasaporte imprime konsentra iha nasionál mak haruka bá munispiu. Sidadaun sira ne’ebé atendimentu normál halo de’it iha munisípiu, no hirak ne’ebé presiza urjente tenke mai to’o nasionál,” nia informa.

Pasaporte ne’ebé oras ne’e iha hanaran pasaporte segunda jerasaun, tanba iha abrit kualidade de seguransa ne’ebé aprova ona no iha mudansa, nune’e laiha impedimentu bá sidadaun sira nia viazen, tanba teste ona iha pasaporte atus hitu molok ne’e no la’o di’ak tebes.

Diretór ne’e esplika, pasaporte sira ne’e ninia tipu bazeia bá nia pagamentu $100 bá tratamentu oras 24, $75 tratamentu loron tolu, $50 tratamentu loron sanulu.

Hahú kedan desde pasaporte laiha iha tinan kotuk, pedidu ne’ebé Servisu Rejistu Notariadu simu hamutuk 2.000, nune’e 700 mak halo ona atendimentu ho pasaporte teste, enkuantu 1.000-resin mak iha hela prossesu atendimentu nia laran.

Jornalista: Gloria Maia