Baucau
MS Sensibiliza Autoridade Lokál Osso-Queli Kona-bá Moras Da’et no La Hada’et
Hatutan.com, (21 Novembru 2023), BAUCAU—Ministériu Saúde (MS) hala’o kampaña imunizasaun nasionál integradu hodi sensibiliza autoridade lokál iha Sentru Saúde Osso-Queli, Postu Admistrativu Vemasse, munisípiu Baucau, liga ho moras hada’et no lá hada’et inklui nutrisaun bá inan isin-rua ho labarik.
Ministériu Saúde (MS) hala’o kampaña imunizasaun nasionál integradu hodi sensibiliza autoridade lokál iha Sentru Saúde Osso-Queli, Postu Admistrativu Vemasse, munisípiu Baucau, liga ho moras hada’et no lá hada’et inklui nutrisaun bá inan isin-rua ho labarik, Tersa (21/11/ 2023). Foto: Leopoldina de Carvalho.
“Ita halo promosaun labele ida deit, tanba ne’e ita soe tempo soe oportunidade. Programa ne’ebe ita lori mak programa moras daet lá hadaet, nutrisaun ba inan no oan ne’ebe, Oinsa atu prevene moras hirak ne’e,” Reprezentante Diretór Jerál Servisu Ospitalares MS, Paulina Pinto hateten iha Baucau, Tersa (21/11/ 2023).
Lee Mós: Postu Saúde Izoladu Haat iha Railaco Presiza Tebes Médiku
Haree ba taxa mortalidade, asidente, moras hada’et no la hada’et ne’ebé númeru kontinua sa’e makás loron-loron MS konsidera katak ne’e tanba menus informasaun bá komunidade iha baze.
Tanba ne’e, nia dehan presiza fó hanoin liu hosi fahe informasaun bá komunidade kona-bá saúde, ema ida-idak iha responsabilidade bá nia saúde, labele hanoin saúde ne’e pessoál saúde nian.
Tuir planu, programa ne’e sei hala’o tuir munisípiu ho durasaun fulan 3 hodi kontinua fahe informasaun iha sentru saúde sira.
Programa ne’e nu’udár programa prioridade MS nian no mós programa kontinuasaun hosi Governu anteriór ho naran vizita domisiliáriu ne’ebé ho nia mekanizmu hala’o vizita bá kada familia, bá komunidade no sosiedade.
Antes né’e MS mós implementa ona programa SISKA ne’ebé servisu integradu ho lider komunitáriu sira hodi bele mobiliza komunidade atu bele partisipa iha atividade importante hirak ne’e.
Iha fatin hanesan Xefe Sentru Saúde Osso-Queli, Médiku Flaviano Verdiál hateten, atu muda ema nia mentalidade no hanoin ne’e la’ós de’it bá ko’alia dala ida husik tiha, maibé presiza ko’alia bebeik nune’e sira bele muda hahalok.
Atividade ne’e involve mós parte relevante sira hanesan Polísia Tránzitu no Diresaun Nasionál Transporte Terrestre (DNTT) hodi hamosu servisu integradu hotu atu bele lori informasaun to’e iha baze.
Mekanizmu fahe informasaun ne’e, hahú uluk hosi líder komunitáriu sira hanesan Admistradór Postu, Xefe Suku, Xefe Aldeia nune’e bele sai servisu integradu entre parte relevante hotu ho objetivu katak informasaun tenki to’o iha baze.
Jornalista: Leopoldina de Carvalho