EUA Oferese $200.000 Hodi Dezenvolve Jestaun Iha MS

Hatutan.com (24 Novembru 2023), Díli— Estadus Unidus Amerika (EUA) oferese $200.000 bá Ministériu Saúde (MS) hodi promove programa kona-bá dezenvolvimemtu lideransa no jestaun Ministeriu nian.

EUA halo Lansamentu bá Apoiu $200.000 hodi promove dezenvolvimentu lideransa noa jestaun iha Ministériu Saúde, Sesta (24/11/2023). Foto: Leopoldina de Carvalho.

Enkarregadu negósiu embaixada EUA, Mark Weintstock hateten, Governu EUA iha kompromisu atu fó apoiu bá Timor Leste ida ne’ebé inkluzivu, prósperu, saudável no atu hadi’a kapasidade inklui forsa traballu hodi hametin sustentabilidade ho governasaun saúde nian.

Lee Mós: MS Kontinua Implementa Servisu Integradu Saúde Iha Baucau

“Ami suporta hodi haforsa kapasidade institusionál liu hosi programa lideransa no dezenvolvimentu jestaun ne’ebé ho objetivu atu promove governasaun di’ak liu, hasa’e kultura organizasaun, optimiza dezempeñu organizasaun no promove utilizasaun dadus ne’ebé efetivu hodi foti desizaun,” Mark Weintstock hateten iha diskursu lansamentu programa dezenvolvimentu lideransa no jestaun iha MS, Sesta (24/11/2023).

Nia espera katak ho apoiu hosi doadór no ajénsia sira bele halo mudansa pozitivu hodi haforsa kapasitasaun no hadi’a kualidade servisu iha komunidade.

Iha biban ne’e, Vise Ministru Saúde, José dos Reis Magno orgullu no agradese tanba programa ida-ne’e hatudu kompromisu bá asisténsia servisu saúde.

Planu estratéjiku nasionál seitór saúde nian tinan 2020-2030 hatudu ho klaru objetivu atu harii MS nia supervizaun.

Estratejia ne’e hatudu vizaun sira atu hadi’a kapasidade saúde ninia diresaun no departementu atu implementa funsaun esensiál sira.

MS liu hosi apoiu USAID nia atividade bá sustentabilidade sistema saúde hamutuk ho ajénsia São João de Deus atu implementa lideransa no dezenvolvimentu jestaun ne’ebé sei suporta bá xefe departementu no xefe unidade sira.

Jornalista: Leopoldina de Carvalho