PGR Kontinua “Taka-Ibun” bá Kazu Set-top Box RTTL, E.P

Hatutan.com, (28 Novembru 2023), Díli— Ministériu Públiku (MP) liu hosi Procurador Geral Republika (PGR) Alfonso Lopez, kontinua lakohi fó komentariu kona-bá prossesu investigasaun bá kazu projetu instalasaun Set-top Box RTTL,E.P.

Set-top Box/dexodificador RTTL,E.P ne’ebé komunidade fó fila hodi rai deit iha Sede Suku Fatuhada, Dili. Foto/Hatutan.com

Tuir informasaun hosi Komisaun Anti Korupsaun (KAK), averriguasaun bá kazu ne’e konklui ona, nune’e enkamiña ona bá Ministériu Públiku (MP), maibé to’o ohin loron seidauk iha rezultadu.

Lee Mós: Deskonfia, PGR Alfonso Lopez “Budu” Kazu Set-top Box RTTL,E.P

Bainhira Jornalista Hatutan.com tenta entrevista PGR, Alfonso Lopez hodi husu kona-bá progressu investigasaun bá kazu ne’e, maibé nia parte lakohi fó komentáriu tanba atu foku de’it bá serimónia Proklamasaun Independénsia bá dala-48.

“Ita mai foku de’it bá atividade serimónia ne’e. Tanba ne’e, ita haree de’it bá ajenda serimónia ne’e,” Alfonso Lopez hateten ba Jornalista Hatutan.com iha Palásiu Prezidensiál Bairru-Pité, Tersa (28/11/2023).

Iha loron 24 fulan-Juñu 2022, Komisaun Anti Korrupsaun (KAK) submete ona relatóriu investigasaun finál bá Ministériu Públiku (MP) kona-bá kazu  projetu instalasaun Set-top Box/dexodificador Rádiu Televizaun Timor Leste, Empreza Públiku (RTTL,E.P) ne’ebé KAK mós deskobre katak iha indísiu fó prejuizu bá Estadu.

Konteúdu hosi relatóriu ne’e, KAK konsege identifika arguidu sira, inklui prejuízu indireta no direta bá Estadu ho valor  liu $60,000.00.

Tinan ida liu ona (fulan-Juñu 2022-2023) kazu ne’e pendente hela iha Ministériu Públiku tanba ne’e deskonfia Prokuradór Jerál Repúblika  (PGR), Alfonso Lopez “budu” prosesu kazu ne’e to’o agora la iha informasaun no laiha transparente bá públiku kona-bá kazu ne’ebé envolve arguido eis-Ministru Asuntu Parlamentár no Komunikasaun Sosiál (MAPKOMS), Francisco  Martins da Costa Pereira Jerónimo.

Bazeia bá rezultadu provas dokumental no sasin hamutuk na’in-17, KAK konsege identifika arguidu na’in-haat (4) ne’ebé involve iha krime abuzu bá podér, partisipasaun ekonomia iha negósiu, konflitu  interese no burla agravada relasiona ho projetu instalasaun Set-top Box/dexodificador Rádiu Televizaun Timor Leste, Empreza Públiku (RTTL,E.P).

Lee Mós: Deskonfia, MAPKOMS Nu’udar Prezidente FFTL Fó Projetu iha RTTL,E.P Ba Sekretaria FFTL

Jornalista: Gloria Maia