Igreja Hosana La Konkorda Legalizasaun-Lokalizasaun Servisu Sex Komersiál

Hatutan.com, (30 Novembru 2023), Díli— Igreja Hosana iha Timor Leste la konkorda ho legalizasaun no lokalizasaun Servisu Sex Komersiál iha Timor-Leste (TL) tanba bele kria kondisaun bá ema idaidak atu la respeita ninia an.

Pastor Moezes Antonio da Silva hosi Igreja Hosana. Foto: Lazaro Pereira Quefi.

“Ezijénsia tempu agora nian ne’ebé ita la’o dadaun maka obriga ita atu defini ita nia an tuir regra liuliu moris tuir ita nia konsiénsia hanesan Nai Maromak Nia povu iha mundu ida-ne’e. Tanba ne’e atu legaliza prostituisaun iha Timor Leste ne’e ema hotu-hotu sei la simu tanba ita iha hela situasaun no kondisaun ne’ebé la hanesan ho nasaun sira seluk,” Pastor Moezes Antonio da Silva hosi Igreja Hosana hateten bá Hatutan.com iha Vila Verde, Díli, Kinta (30/11/2023).

Lee Mós: Servisu Sex Komersiál Eziste, INKSIDA Esforsu Legaliza no Lokaliza

Pastor ne’e rekoñese katak, dalaruma ezijénsia hirak ne’e tanba iha kauza balun tanba atu prevene de’it moras HIV/SIDA, maibé nia mós husu katak, bainhira halo legalizasaun sei prevene duni ka la’e.

Tanba ne’e mak nia dehan katak, edukasaun ba Timoroan sira mak importante liu no la’ós legalizasaun mak importante liu iha tempu ohin loron nian.

“Ita hotu tau atensaun liu hosi família, grupu, lideransa komunitáriu sira tenki iha hanoin ida atu bele disiplina ba ita nia an rasik, kuidadu situasaun ne’ebé mak ita hasoru dadaun no lalika fó dalan atu hetan legalizasaun,” Pastor ne’e rekomenda.

Igreja Hosana apela no fó hanoin nafatin bá ema hotu-hotu tenke tau an halo didi’ak atu labele hakat liu ba sasan ne’ebé ema hotu lakohi.

Buat hotu-hotu fila bá idak-idak nia an, bainhira Estadu hili desizaun atu legaliza prostituisaun ne’e no konsidera hanesan servisu ida, entaun ema na’ok-ten no korruptór sira mós sei ezije atu hetan legalizasaun tanba ne’e pozisaun Igreja Hosana maka ne’e,  lalika legaliza kedan.

Jornalista Estajiáriu:  Lazaro Pereira Quefi