TL-Indonézia Finaliza Negosiasaun Fronteira Terrestre no Avansa bá Asinatura Tratadu

Hatutan.com, (30 Novembru 2023), Díli—Primeiru-Ministru (PM) Kay Rala Xanana Gusmão atualiza katak, Timor-Leste (TL) ho Indonézia finaliza ona negosiasaun bá assuntu Fronteira Terrestre no hein avansa bá asina akordu tratadu iha tempu badak.

Primeiru-Ministru (PM) Kay Rala Xanana Gusmão hasoru-malu ho Prezidente Repúblika, José Ramos-Horta, Kinta (30/11/2023). Foto: Elio dos Santos da Costa.

Xanana Gusmão hateten, assuntu prinsipál liu durante enkontru ho Prezidente Repúblika, José Ramos-Horta iha Kinta (30/11/2023), ko’alia liu kona-bá enkontru ho ekipa Indonézia ne’ebé sei iha hela Timor Leste no ohin sei kontinua enkontru kona-bá fronteira terrestre atu finaliza tiha fronteira terrestre.

Lee Mós: Negosiasaun Fronteira Terrestre TL-RI Atinje 90%

“Ohin informa ona bá Xefe Estadu katak enkontru sira ne’e la’o di’ak ona no bainhira mak assina tratadu, no atu oinsa, sira ne’e ikus ona tanba ekipa ida hosi Indonézia nian sei fila-fali ba Indonézia hodi informa ba Governadór sira Indonézia nian,” Xanana Gusmão hateetn iha Palásiu Prezidensiál Nicolau Lobato Bairru-Pité.

Xefe Governu afirma, dezde loron 20 to’o 27 Novembru tinan ne’e, ekipa sira iha Oecusse sukat ona no tau marka bá área sira fronteira nian no servisu ne’e hotu tiha ona.

Antes ne’e, delegasaun hosi Repúblika Demokrátika Timor-Leste no delegasaun hosi Repúblika Indonézia ni’an, hasoru-malu hodi hala’o Konsultasaun Ofisial Sénior (SOC, sigla Inglês) ba dala-ne’en hahu hosi loron 13 to’o 14 fulan Outubru liu bá iha Nusa Dua-Bali, Indonézia, hodi kontinua halo diskusaun kona-bá segmentu naun-rezolvidu Noel Besi-Citrana iha fronteira terrestre, Oe-cusse ni’an.

Jornalista: Vito Salvadór