Xanana Laiha Kompeténsia Intervén Subsídiu Transporte-Saúde bá Deputadu Sira

Hatutan.com, (30 Novembru 2023), Díli—Primeiru-Ministru (PM), Kay Rala Xanana Gusmão deklara katak,  subsídiu Transporte no Saúde bá Deputadu sira, ida-ne’e Parlamentu Nasionál (PN) mak diskute no Primeiru Ministru laiha kompeténsia atu intervén.

Primeiru-Ministru (PM), Kay Rala Xanana Gusmão. Foto: Elio dos Santos da Costa.

Xanana Gusmão hato’o deklarasaun ne’e hodi hatán bá pergunta ne’ebé jornalista sira husu relasiona ho públiku no sosiédade sivil sira nia preokupasaun kona-bá projetu Lei Nú. 4/VI (1”), ne’ebé prosede ba alterasaun datoluk ba Estatutu Deputadu tuir Lei Nú 5/2004, de 5 de Maio, ne’ebé altera ba Lei nú. 7/2017, de 26 de abil e 4/2023, de 25 de janeiro iha artigu 12 ne’ebé ko’alia kona-bá subsídiu bá deputadu sira, iha ne’ebé hateten katak, kada deputadu sei iha direitu bá subsídiu transporte kada fulan ho montante $1.600 no saúde ho valór $600 kada fulan.

Lee Mós: Prezidente Repúblika Sei Veta Subsídiu Transporte-Saúde bá Deputadu Sira

“Kona-bá subsídiu transporte no saúde bá deputadu sira ne’e iha Parlamentu Nasionál mak diskute. Ha’u labele manda fali Deputadu sira,” Primeiru-Ministru hateten iha Palásiu Prezidensiál Nicolau Lobato Bairru-Pité, Kinta (30/11/2023).

Antes ne’e, Prezidente Repúblika José Ramos-Horta hateten ona katak subsídiu Transporte no Saúde bá deputadu sira ne’e bo’ot tebe-tebes no tuir loloos la merese tanba Estadu iha Orsamentu Jerál tau ona osan bá Saúde liu hosi Ministériu Saúde.

Tanba ne’e, Prezidente Repúblika dehan sei ko’alia ho Primeiru-Ministru no Prezidente Parlamentu Nasionál atu haree labele iha klase ida ne’ebé iha benefísiu hotu-hotu no barak loos, deputadu sira iha ona vensimentu di’ak hakarak tán subsídiu oin-oin, di’ak liu deputadu sira sukat didi’ak molok aprova subsídiu ba sira nia na rasik.

Tanba ne’e Ramos-Horta promete katak, haensan Xefe Estadu  iha kapasidade atu veta Lei ne’e.

Jornalista: Vito Salvadór