Akadémiku Husu IX Governu Reforma Buat Tolu iha Seitór Justisa

Hatutan.com, (04 Dezembru 2023), Díli— Akadémiku hosi Universidade da Paz (UNPAZ) husu bá IX Governu liu hosi Ministru Justisa (MJ) atu reforma duni iha Seitór Justisa liuliu buat tolu prioridade mak hanesan Estrutura Judisiál, Administrasaun no Lingua ne’ebé utiliza bá sistema Judisiál nian.

Imajen Google.

Akademista hanesan mós Jurista, Reinaldo Francisco Luis hateten, durante ne’e nia akompaña sistema judisiál iha rai laran, desizaun hotu-hotu la la’o tuir prinsípiu sira ne’ebé vigora ona iha nasaun ne’e.

Lee Mós: Xanana Nomeia Lúcia Lobato Lídera Grupu Traballu bá Reforma Seitór Justisa

“Saída mak ha’u atu sita iha ne’e, Parlamentu Nasionál nia kazu laiha desizaun to’o agora. Deputadu balun ne’ebé komete kazu sériu laiha desizaun to’o agora,” nia hateten iha UNPAZ horisehik. 

Tanba ne’e, nia husu bá Governu ne’ebé lidera hosi Primeiru Ministru (PM), Kay Rala Xanana Gusmão, Presiza halo reforma Jústisa iha área tolu ne’e.

Tuir nia haree katak, tempu ona atu Governu presiza harii Tribunál Supremu, tanba durante tinan 21 ona Timor-Leste ukun an, buat barak mak akontese iha Tribunál Rekursu hanesan desizaun ne’ebé mak sira foti la tuir prinsipiu lia loos nian.

“Tuir loloos, Tribunál mak iha kompeténsia boot atu foti desizaun, halo kontrolu ba desizaun sira iha Estadu ida-ne’e hodi haree povu ne’e nia justisa loloos. Maibé ida-ne’e laíha,” nia hateten.

Nia sujere katak, Estadu mós presiza harii Tribunál iha kada munisípiu, nune’e bele lori diretamente justisa bá povu iha área remotas.

Akademista ne’e husu Governu atu reforma lingua ne’ebé durante utiliza iha seitór justisa liu-liu halakon tiha lingua Portugueza no uza de’it lian Tetum, tanba bele fasilita timoroan sira kompriende liu kompara ho lian Portugés.

Jornalista: Gloria Maia