Banku Mundiál Prontu Apoia Dezenvolvimentu Ekonomia TL

Hatutan.com, (04 Dezembru 2023), Díli—Banku Mundiál iha Timor Leste (TL) pronto atu fó apoiu bá dezenvolvimentu ekonomia nasaun ne’e.

Diretora Banku Mundiál iha Timor Leste, Satu Kahkone.

Prontidaun ne’e Diretora Banku Mundiál iha Timor Leste, Satu Kahkone hato’o hafoin hasoru-malu ho Primeiru Ministru (PM), Kay Rala Xanana Gusmão iha Palásiu Governu, Segunda (04/11/2023).

Lee Mós: Banku Mundiál: Timor-Leste Nia Kreximentu PIB Atrazu iha Nivel Rejionál

Satu Kahkone senti privileziada bo’ot ida tanba bele hasoru-malu ho Primeiru Ministru hodi diskute kona bá assuntu ne’e.

“Banku Mundiál tenki apoia dezenvolvimentu ekonomia Timor Leste, hasa’e kualidade moris povu nian ho dignu, liu hosi apoiu saúde, hadi’a estrada no buat seluk tán,” nia hateten.

Durante ne’e Banku Mundiál mós akompaña hela debate Orsamentu Jerál Estadu (OJE) 2024, no hein rezultadu hosi debate ne’e nune’e bele haree saida mak bele halo no hein katak bele investe bá nesesidade bázika sira.

Banku Mundiál haree katak, Timor Leste iha dezenvolvimentu ne’ebé di’ak hafoin Pandemia Covid-19, Timor Leste kontinua investe iha infraestrutura bázika hodi apoia kresimentu ekonómiku.

Banku Mundiál konsidera Governu ida-ne’e Governu foun ne’ebé esforsu tebes atu atinji kresimentu ekonómiku bá %5 no mós kria kampu traballu ba nia povu.

Jornalista: Leopoldina de Carvalho