Fundasaun GX Hosi Xina Hakarak Apoia TL iha Área Saúde

Hatutan.com, (04 Dezembru 2023), Dili—Primeiru-Ministru (PM), Kay Rala Xanana Gusmão simu Prezidente Fundasaun GX, Leung Chun Ying hosi Xina, hodi ko’alia kona-bá prontidaun atu fó apoiu bá Timor Leste (TL) iha área saúde.

Primeiru-Ministru (PM), Kay Rala Xanana Gusmão simu Prezidente Fundasaun GX, Leung Chun Ying hosi Xina, hodi ko’alia kona-bá prontidaun atu fó apoiu bá Timor Leste (TL) iha área saúde, Segunda (04/12/2023). Foto: Leopoldina de Carvalho.

Primeiru Ministru konsidera vizita ida-ne’e diferente tebes entre vizita hosi delegasaun Xineza sira seluk tanba mai ho preokupasaun kona-bá problema saúde iha Timor-Leste.

Lee Mós: Xína Kontinua Apoia TL iha Área Espesífiku Sira

“Iha Sábadu no Domingu, sira la’o hale’u munisipiu Baucau, Maubisse no fatin seluk tán haree ita nia ospitais, haree ita nia klinika, ita nia povu nia situasaun saúde. Ne’ebé, sira fila ho koñesimentu ida-ne’e. Tanba ne’e sira hakarak apoiu iha área saúde,” Xanana Gusmão hateten iha Segunda (04/11/2023).

Fundasaun Xineza ida-ne’e sei fila fali bá Xina no sei haruka kedan ekipa ida mai haree, foku liu iha área saida tán mak atu ajuda.

Nune’e mós Prezidente Fundasaun GX hateten, vizita ida ne’e nu’udár vizita ida bá promulgasaun deklarasaun konjunta entre Xina ho Timor-Leste ne’ebé anunsia ona iha loron 23 Setembru tinan ida-ne’e.

“Ita ko’alia kona-bá saida mak nasaun rua ne’e bele halo hamutuk hodi hatán bá preokupasaun saúde publika ne’ebé foka liu ba servisu hosi Fundasaun GX nu’udár ONG husi Hong Kong no mos parte ida hosi Xina nu’udár rejiaun administrativa espesiál ida iha Xina Norte,” Prezidente Fundasaun GX esplika.

Durante loron haat ne’e ekipa hala’o vizita bá ospitál, sentru saúde sira, hodi ko’alia mós ho profisionál saúde no Ministeriu Saúde rasik atu haree bá nesesidade doméstika sira ho detallu liu.

Nia agradese bá Primeiru Ministru bá apoiu ne’ebé fó ona, no aespera katak sei servisu hamutuk ho di’ak no halo buat ruma ne’ebé sei responde bá nesesidade povu Timor Leste nian.

Espíritu ida hosi Fundasaun GX nian maka estabelese kooperasaun internasionál oinsa iha konetividade hosi povu-bá-povu.

Fundasaun GX nu’udár organizasaun naun-governamentál ida iha área assaun karidade ne’ebé lokaliza iha Hong Kong ho nia espíritu bá kooperasaun internasionál.

Jornalista: Leopoldina de Carvalho