ESTV Tastopa Hatu-do, Ervinia da Costa Neves, Departementu Tékniku de Comersiu ho valor 28,93
Ministériu Edukasaun (ME) liu hosi Gabineti Avaliasaun Dezenvolvimentu Kurikulár organiza ona ezame nasionál ba alunu sira iha IX anu, ensinu báziku, désimu segundu anu ba ensinu sekundáriu iha loron 16 to’o 19 fulan Outubru tinan 2023.
Ministra Edukasaun, Dulce de Jesus Soares.
Ministra Edukasaun, Dulce de Jesus Soares hateten, ezame nasionál nu’udár pasu importante tebes iha estudante sira nia moris akadémiku, tanba sai nu’udár instrumentu avaliasaun sumartivu ida ba estudante sira ne’ebé atu remata sira nia estudu iha ensinu báziku IX anu, no mós ba sira iha désimu segundu anu ne’ebé atu konklui sira nia ensinu sekundáriu.
“Tuir ezame nasionál fó oportuniadade ida atu sukat estudante sira nia dezempeñu atu avalia kualidade ensinu atu fornese informasaun bá planeamentu edukasaun iha futuru partikularmente ba ensinu sekundáriu, atu fasilita triazen bá kandidatu ne’ebé atu assesu ba ensinu superior,” Dulce de Jesus Soares hateten iha ámbitu anunsiu rezultadu ezame nasionál.
Ministra Edukasaun mós kongratula professór sira hotu ne’ebé ho profisionalizmu tomak eduka no prepara no orienta ona oan doben sira hodi to’o ona iha pontu ida-ne’e.
Advertisement
Rezultadu ezame nasionál aponta katak taxa aproveitamnetu escolár liu 80% ba ensinu báziku no mós ba ensinu sekundúriu iha nível nasionál.
Nun’e ME konsidera katak hosi prespetiva implementasaun pedagózika eskola balun halo ona servisu di’ak no iha esperansa katak iha tinan sira tuir-mai estudante sira atu hatudu dezempeñu di’ak liu do que tinan ida-ne’e.
Hanesan hatuur ona iha Lei, rezultadu ezame nasionál sura hamutuk ho valor eskola hodi hamosu valor final ne’ebé sei determina alunu ne’e aprovadu ka la’e.
“Iha tinan akadémiku 2023, maski taxa aproveitamentu liu 80% maibé iha grupu balun reprovadu, la konsege alkansa kompeténsia ne’ebé hatur iha padraun kurrikulu nian. Labele husik ida hapara imi nia antuziasmu atu aprende nafatin. Ami fiar katak alunu ida iha nia potensia extraordináriu no bele susesu iha future,” nia dehan.