EUA Apoia Mellora Kampu Aviasaun Iha TL

Hatutan.com, (12 Dezembru 2023), Díli— Embaixada Estadus Unidus Amérika (EUA) iha Timor-Leste (TL), reprezenta hosi Enkarregadu Negósiu, Marc Weinstock hamutuk ho Majór Jenerál Cornelio Ximenes Maunana no Reprezentativu hosi Ministériu Defeza (MD) partisipa iha Serimónia entrega iluminasaun Pista iha Aeródromu Baucau, Tersa (12/12/2023).

Serimónia Entrega Pista no Aeródromu nia Iluminasaun ba Komponente Aérea F-FDTL. Foto: EUA iha Dili.

Eventu entrega ida-ne’e simboliza Estadus Unidus nia kompromisu ne’ebé metin hodi apoia Timor-Leste harii ninia Komponente Aérea no Rehabilita Aeródromu Baucau.

Lee Mós: EUA Oferese $200.000 Hodi Dezenvolve Jestaun Iha MS

Iha tinan rua nia laran liubá, hala’o ona melloramentu lubuk ida, hahú hosi tau rede to’o ba hadi’ak armazen no dezenvolve ekipamentu apoia sira.

Enkarregadu Negósiu Weinstock enfatiza kona-bá espíritu kolaborativu ba esforsu hirak ne’e, liuliu bá apoia importante hosi Diretór Jenerál Nuno, Diretór Jenerál Aniceto no mós reprezentativu hosi aviasaun sivíl no mós autoridade aeroportu nasionál.

“Ida-ne’e hanesan testemuña forte ida haree ba atinjimentu liuhosi serbisu hamutuk,” Hatutan.com sita deklarasaun Enkarregadu Negósiu, Marc Weinstock iha komunikadu.

Iha fulan Juñu tinan ida-ne’e, hetan atinjementu signifikante lubuk ida ho entrega Timor-Leste nia aviaun militár dahuluk, aviaun Cessna ida, ne’ebé kompleta ho ekipamentu halo monitorizasaun ba fronteira marítima nian.

Haree ba oin, Estadus Unidus komprometidu hodi konstrui hangar ida, hodi fasilita operasaun aéreu iha Baucau.

Liuhosi kolaborasaun ho ró patrulla ne’ebé fornese hosi Austrália, hahú haforsa kapasidade bá halo patrulamentu ba marítima, salvaguarda Timor-Leste ninia Zona Ekonomia Eskluziva (EEZ) no soberania.

Estadus Unidus haforsa fila-fali ninia kompromisu hodi hamriik ho parseiru multilateral sira, inklui Timor-Leste, hodi kria oportunidade, hametin amizade, no mantein Indo-Pasífika ida ne’ebé livre no nakloke.

Jornalista Estajiáriu: Lazaro Pereira Quefi