Kliente Halerik ho Problema Internet, Ministru Manetelu: Depois Mak Ita Ko’alia

Hatutan.com, (12 Novembru 2023), Díli—Durante tempu naruk ona mak kliente sira preokupa ho liña internet ne’ebé kapasidade tun loos, maibé laiha intervensaun ruma hosi parte kompetente sira atu bele fó solusaun ruma, nune’e Hatutan.com koko atu hato’o lian hirak ne’e bá ukun-na’in sira maibé Ministru Transporte no Komunikasaun (MTK), Miguel Marques Gonçalves Manetelu dehan depois mak sei ko’alia kona-bá assuntu ne’e.

Ministru Transporte no Komunikasaun (MTK), Miguel Marques Gonçalves Manetelu. Foto dok. Miguel Manetelu.

“Rede internet ne’e ha’u ko’alia bebeik dala-tolu ka haat ona. Hakarak halo notisia foti voice iha ha’u nia media officer hakerek de’it. Ita boot entrevista ha’u mak ha’u ko’alia la hanesan fali uluk ne’e ema dehan ha’u bosok. Loos ona, depois mak ita ko’alia,” Manetelu hateten ba jornalista Hatutan.com hafoin diskusaun Jeneralidade OJE 2024 iha PN Díli.

Lee Mós: Kliente Halerik ho Problema Internet, PN Husu Responsabilidade TT-Telemor-Telkomcel

Antes ne’e, Prezidente Tane Konsumidór, António Ramos da Silva hateetn, Tane Konsumidór sujere ona bá Governu atu fó feedback bá inisiativa Lei ne’ebé mak Tane konsumidór submete ona bá Konsellu Ministru iha loron 06 fulan Outubru tinan 2022 no hetan kobertura hosi média sira hotu.

Alterasaun bá Dekretu Lei númeru 15/2012, loron 29 de Marsu kona-bá Estatutu ANC nian, bazeia bá karta loby ne’ebé Tane Konsumidór submete ona bá Ministériu Transporte no Komunikasaun no kopia bá ANC iha tinan 2021, aselera prosesu ba implementasaun infraestrutrua Fibra Optika liu hosi dada Cabo Submarine mai hosi Austrália, nune’e hasa’e kapasidade internet ne’ebé atualmente ita konsumu iha Timor-Leste 26 G ho Cabo Submarino bele aumenta kapasidade nune’e bele rezolve problema sira ne’e.

Hatutan.com mos esforsu ona hodi halo entrevista ho parte Operador Telekomunikasaun tolu iha Timor Leste hanesan Timor Telecom, Telemor no Telkomcel maibe seidauk disponivel atu fo komentariu.

Jornalista Estajiaria: Lazaro Pereira Quefi