OJE 2024 bá Prezidénsia Repúblika $10.948.750 Pasa Iha Espesialidade

Hatutan.com, (15 Dezembru 2024), Díli—Parlamentu Nasionál (PN) liu hosi votasaun espesilaidade bá Orsamentu Jerál Estadu (OJE) 2024, aprova ona orsamentu bá Prezidénsia Repúblika (PR) ho totál  $10.948.750 ho rezultadu a-Favor 42, kontra 10 no abstensaun 13.

Diskusaun bá Orsamentu Jeral Estadu (OJE) tinan 2024 iha Parlamentu Nasionál (PN) ba Jeneralidade, Tersa (12/12/2023). Foto: Elio dos Santos da Costa.

“Rezultadu votasaun a-Favor 42, kontra 10 no abstensaun 13. Nune’e orsamentu bá PR pasa,” Prezidente Parlamentu Nasionál, Maria Fernanda Lay hateten iha PN, Kinta (14/12/2023).

Lee Mós: Proposta OJE 2024 Billaun $1,95 Pasa Iha Jeneralidade

Alokasaun OJE 2024 bá Prezidénsia Repúblika tinan 2024 ho totál $10.948.750 kategória bá programa saláriu vensimentu $4.109.971, Bens Servisu korrente $5.538.220, transférensia públika $1.050.559, Kapitál menór zero, Kapitál dezemvolvimentu $250.000.

Deputadu bankada FRETILIN, Antoninho Bianco hateten, bainhira Prezidente Repúblika bá halo viajen representa Novél da Paz labele uza osan Estadu nian.

“Tanba orsamentu ne’ebé ami detekta, tuir ami nia hanoin katak fó kontribuisaun balun atu fó poupansa. Ami dehan labele, di’akliu sé mak halo konvite bá Prezidente hanesan prémiu Nobél da Paz ne’ebé ema baibain la’o fatin-fatin maibé sira ne’ebé fó konvite ne’e maka tenke tau osan,” Antoninho Bianco hateten.

Vise-Primeiru Ministru, Mariano Asanami Sabino hatán katak, Prezidente Repúblika nu’udár Xefe Estadu, nune’e ninia viajen hotu Estadu mak sei responsabiliza.

“Prezidente Repúblika nu’udár Xefe Estadu no durante tinan lima ne’e nia laran, Prezidente atu bá iha ne’ebé de’it primeiru tenke aprova viajen hosi PN. Tanba ne’e, atividade hotu-hotu ne’ebé mak Prezidente la’o ne’e Estadu maka haree. La’ós ema mak atu selu fali Prezidente nia tiket ka fó fali perdiam bá Prezidente. Orsamentu ne’ebé aloká bá Prezidénsia ne’e tetu ho didi’ak ho kle’an no ida-ne’e merese duni bá Prezidente Repúblika nu’udár Xefe Estadu no nia iha responsabilidade boot bá  rekonsiliasaun no paz,” Mariano Asanami Sabino hateten.

Iha proposta 33 ne’ebé aprezenta hosi proponente deputadu Joaquim dos Santos, Antoninho Bianco, David Dias Ximenes Mandati, la pasa iha votasaun ho rezultadu a-Favor 24, kontra 38 no abstensaun 3.

Jornalista Estajiária: Zita Menezes