Hatutan.com, (16 Dezembru 2023), Díli— Parlamentu Nasionál liuhosi votasaun iha debate espesialidade Orsamentu Jerál Estadu (OJE) 2024 ne’ebé aloká $67.600.906 bá Ministériu Saúde (MS) ho pasa ho a-favor 44, kontra 2, abstensaun 19.
OJE 2024 ne’ebé alokadu bá Ministériu Saúde ho montante $67.600.906, fahe bá kategoria bá saláriu vensimentu $36.706.970, Bens servisu no korrente $13.426.403, Transferénsia Públika $12.590.400, Kapitál menór $2.977.133 no Kapitál Dezemvolvimentu $1.900.000.
Lee Mós: Proposta OJE 2024 Billaun $1,95 Pasa Iha Jeneralidade
“Orsamentu bá Ministériu Saúde pasa ona,” Prezidente PN, Maria Fernanda Lay hateten iha plenária, Sesta (15/12/23).
Deputada bankada PLP, Maria Angelina Sarmento rekomenda bá Ministériu Saúde hodi selu dívida sira ne’ebé pasiente Timoroan bá halo tratamentu iha ospitál estranjeiru.
“Atu rekomenda de’it ba Ministériu Saúde atu rezolve ita-nia dívida sira ne’ebé mak ita tenke selu ligadu ho pasiente sira ne’ebé hala’o tratamentu iha ospital Malázia,” Maria Angelina Sarmento rekomenda.
Ministra Saúde, Elia Amaral hatán bá assuntu dívida katak, Ministériu Saúde halo esforsu durante ne’e no konsegé selu ona balun.
“Bá divida ne’ebé iha katak IX Governu esforsu makaas no foin fulan lima ka neen de’it divida sira ne’e selu ona iha nasaun Malázia, Indonézia no Singapura porvolta hosi fulan Janeriu to’o Outubru 2023 hamutuk millaun $6-resin. Dívida ne’e mai hosi Governu anteriór,” Ministra Saúde klarifika.
MS mós simu fali ona invoice foun hosi pasiente sira ne’ebé bá hala’o tratamentu iha fim do anu iha fulan Outubru, Novembru ho Dezembru nian akumuladu millaun $5.1 atu bele selu iha fulan Dezembru nia laran.
Jornalista Estajiária: Zita Menezes
