OJE 2024 bá MJDAK $8.451.773, Opozisaun Kestiona Alokasaun $300.000 bá GAM

Hatutan.com, (18 Dezembru 2023), Díli—Parlamentu Nasionál (PN) liuhosi votasaun iha diskusaun espesialidade aprova ona Orsamentu Jerál Estadu (OJE) 2024 bá Ministériu Juventude Desportu Arte no Kultura (MJDAK) ho montante $8.451.773 votasaun a-favor 42, kontra 6 no abstensaun 15.

Votasaun bá Orsamentu Jeral Estadu (OJE) tinan 2024 iha Parlamentu Nasionál (PN) Jeneralidade, Tersa (12/12/2023). Foto: Elio dos Santos da Costa.

Iha intervensaun, deputadu bankada oposizaun FRETILIN preokupa ho orsamentu ne’ebé Governu kontinua aloka bá Grupu Arte Marsiais (GAM), maske daudaun ne’e suspende hela atividade.

Lee Mós: Proposta OJE 2024 Billaun $1,95 Pasa Iha Jeneralidade

“Arte Marsiais ne’e suspende ona bá fulan hira mai oin, maibé ita tau nafatin orsamentu $300.000 hodi halo saida. Ne’e tenke hetan esplikasaun,” deputadu Antoninho Doutel Sarmento hateten iha PN, Segunda (18/12/23).

Nune’e mós deputada FRETILIN Marquita Soares mós preokupa ho orsamentu ne’e tanba IX Governu halo ona suspensaun bá GAM, nune’e osan ne’e atu fó de’it bá membru GAM ka funsionáriu KRAM.

Relasiona ho asuntu GAM, Ministru Juventude Desportu Arte no Kultura, Nélyo Isaac Sarmento haktuir katak, orsamentu ne’ebé Governu aloka bá GAM ne’e atu kontinua fó formasaun hodi eduka joven sira.

“Ha’u atu hateten katak, GAM suspende la’ós taka. Signifika, ita tenke tau nafatin hodi fó formasaun bá instrutór, treinadór sira oinsá organiza organizasaun ne’e rasik no oinsá prepara treinadór sira hanesan professór ida hodi fó edukasaun bá joven sira,” nia hateten.

Nia dehan, IX Governu la’ós taka GAM maibé suspende provizóriu de’it atividade tanba iha kauza fulan hirak liubá kona-bá konfronu no mós iha krime ne’ebé mosu iha postu no suku no bairru balun ne’ebé involve membru GAM hanesan sona malu, sunu uma no estraga ema nia sasan.

Orsamentu ne’ebé Governu alokadu bá MJDAK ho montante $8.451.773, fahe bá kategoria Saláriu Vensimentu $2.721.048, Bens Servisu Korrente $1.150.005, Transferénsia Públika $3.434.737, Kapitál Menor zero (0), Kapitál Dezemvolvimentu $745.983

Jornalista Estajiária: Zita Menezes