Hatutan.com, (18 Dezembru 2023), Díli—Prezidente Repúblika (PR), José Ramos-Horta antes ne’e iha duni komunikasaun ho Governu, maibé hanesan Xefe Estadu iha duni kompeténsia prerrogativu tuir Lei atu foti desizaun hodi fó indultu bá Emília Pires ho Madalena Hanjam.
“Indultu bá Emilia Pires no Madalena Hanjam ne’e Prezidente Repúblika iha duni komunikasaun ho Governu no la’ós de’it Ministériu Justisa maibé mós iha Primeiru-Ministru. Iha kazu indultu ne’e kompeténsia prerrogativu Prezidente Repúblika nian. Tanba ne’e Governu labele halo komentáriu,” Ministru Justisa Amândio de Sá Benevides hateten iha Palásiu Prezidensiál Nicolau Lobato Bairr-Pité, Segunda (18/12/2023).
Lee Mós: Emília Pires Merese Hetan Indultu Tanba Kontribui bá Luta Ukun-an no Prosesu Dezenvolvimentu TL
Indultu ne’ebé Prezidente Repúblika José Ramos-Horta fó bá Emilia Maria Valeria Pires no Madalena Fernandes Melo Hanjam Costa Soares bazeia bá Dekretu Prezidente Repúblika númeru 125/2023, loron 14 fulan-Dezembru kona-bá Concessão de indulto por ocasião da Quadra Natal do ano 2023.
Prezidente Republika, tuir parágrafu i) hosi artigu 85 Konstituisaun no Lei no. 20/2023, 12 Dezembru hafoin rona tiha Governu, deskreve hanesan tuir mai ne’e:
Indultu kompletu fó bá sidadaun sira ne’ebé identifika ona iha kraik, relasiona ho sentensa sira ne’ebé Tribunál Judisiáriu Primeiru-Instánsia Díli aplika iha loron 7 fulan-outubru tinan 2022, iha ámbitu prosesu ne’ebé akontese tuir númeru NUC 1212/12.PDDIL, tuir razaun sira iha leten.
Temi tanba ne’e nesesáriu tan razaun umanitária:
- Emilia Maria Valeria Pires;
- Madalena Fernandes Melo Hanjam Costa Soares.
Parlamentu Nasionál (PN) iha Loron 15 Novembru 2023, liuhosi plenária Extra-órdinaria aprova iha Votasaun finál Globál ba Projetu Lei nú. 1/VI(1ª) Prosedimentu Konseisaun Indultu no Komutasaun ba Pena, ho votu afavór 36, kontra 25 no abstensaun 2.
Prezidente Komisaun A ne’ebé trata asuntu Lejizlasaun no Justisa, deputadu Patrocinio Fernandes esplika, Projetu Lei númeru 1/VI(1ª) kona-bá Prosedimentu Konseisaun Indultu no Komutasaun bá Pena, fó kompeténsia bá Prezidente Repúblika (PR) atu bele fó perdaun bá pekadór sira iha komarka nu’udár umanu.
Jornalista: Vito Salvadór
