Hatutan.com, (19 Dezembru 2023), Díli—Governu planeia ona iha tinan 2024 atu halo atendimentu bá timoroan sira iha diáspora ne’ebé hakarak trata passaporte.
Ministru Justisa (MJ), Amândio de Sá Benevides hato’o ona assuntu ne’e bá Prezidente Repúblika, José Ramos-Horta iha Palásiu Prezidensiál Nicolau Lobato Bairru-Pité, (18/12/2023).
Lee Mós: Dudu-Malu To’o Balun Kanek, MJ Husu Sidadaun Sira bá Trata Pasaporte Iha Munisípiu
Planu ne’e sei realiza duni tanba Ministériu Justisa simu preokupasaun sidadaun sira iha diáspora liu-liu traballadór sira iha Inglatera no Irlándia kona-bá problema passaporte.
“Ita mai esplika bá Xefe Estadu katak Governu liu hosi Ministériu Justisa tau ona osan liu hosi Orsamentu Jerál Estadu atu iha tinan oin bele halo ona atendimentu bá komunidade Timoroan sira iha Inglatera, Portugál no Korea Súl inklui fatin sira seluk ne’ebé Timoroan sira hela bá,” Ministru Justisa Amândio de Sá Benevides hateten hafoin hasoru Xefe Estadu.
Governu tau ona osan bá atendimentu passaporte iha diáspora no osan ida-ne’e aprova ona iha Parlamentu Nasionál iha faze espesialidade ba Ministériu Justisa nian.
Nia iha esperansa boot katak, MJ sei realiza duni planu ida ne’e tanba orsamentu mós aprova ona iha PN.
Jornalista: Vito Salvadór
