OJE 2024 bá Institutu Nasionál Kombate HIV-SIDA $798.212

Hatutan.com, (20 Dezembru 2023), Díli—Parlamentu Nasionál (PN) liuhosi votasaun espesialidade iha diskusaun Orsamentu Jerál Estadu (OJE) 2024  hamutuk $798.212 bá Instituisaun Nasionál Kombate HIV-SIDA,I.P aprovadu ho votasaun a-favór 43, kontra 3, abstensaun 18.

Imajen Ilustrasaun Google.

Orsamentu ne’ebé Governu aloka bá Instituisaun ne’e ho montante $798.212, fahe bá kategoria Saláriu Vensimentu $340.600, Bens Servisu Korrente $432.512, Transferénsia Públika zero (0) , Kapitál Menor $25.100 no Kapitál Dezemvolvimentu zero (0).

Lee Mós: Servisu Sex Komersiál Eziste, INKSIDA Esforsu Legaliza no Lokaliza

“Ha’u nia preokupasaun maka HIV-SIDA afeita bá inan isin-rua ne’ebé tuir dadus makaas tebes. Tanba ne’e husu bá Ministériu Saúde  no Instituisaun ne’e tau atensaun makaas bá inan isin-rua sira ne’e, se la’e ita  hahoris de’it jerasaun sira ne’ebé frázil ho kondisaun saúde la di’ak,” deputada PD, Maria Teresa intervens iha plenária PN, Tersa (19/20/23).

Nune’e mós deputada bankada PLP, Maria Angelina Sarmento sekunda katak, númeru kazu HIV-SIDA tuir dadus instituisaun ne’e  katak ema na’in 2000-resin maka afeitadu.

Infelizmente orsamentu bá programa ne’e ho de’it $798.212 de’it. Bainhira haree fali bá papél komisaun ne’e katak, importante liu maka atu halo diseminsaun informasaun maibé osa ne’e kiik liu.

“Asuntu ida-ne’e asuntu Estadu. Ita preokupa tebes tanba ita nia sidadaun sira maioria afetadu bá moras ida-ne’e no tenke hatene katak, to’o agora mundu seidauk hatene nia ai-moruk hodi kura. Nune’e, ita presiza halo agressivu atu bele prevene ita nia oan, ita nia sidadaun ne’ebé afeitadu,” nia hateten.

Primeiru Ministru Interinu, Mariano Asanami Sabino hatán katak, orsamentu ne’ebé Governu aloká bá instituisaun ne’e sei tau prioridade liu bá kampaña prevensaun.

“To’o agora ita iha feto 645 no mane iha 1.357 mak afeitadu. Nune’e orsamentu ne’ebé ita aloka ne’e barak liu agora halai liubá kampaña prevensaun nomós diseminasaun informasaun. Kuandu afeita ona Ministériu Saúde mak sei halo tratamentu gratuita,” nia hateten.

Jornalista Estajiária: Zita Menezes