Redasaun Finál bá Proposta Lei OJE 2024, Mudansa Iha Rúbrika Tolu

Hatutan.com (21 Dezembru 2023), Díli—Parlamentu Nasionál (PN) liuhosi Prezidente Komisaun C ne’ebé trata assuntu Finansas Públika, deputada Cedeliza Faria dos Santos informa katak, hafoin halo redasaun finál bá tetu Orsamentu Jerál Estadu (OJE) 2024, laiha mudansa bá ninia montante no mantein ho billaun $1.95, iha de’it mak mudansa iha rúbrika tolu.

Deputada Cedeliza Faria dos Santos. Foto: Elio dos Santos da Costa.

“Horseik ami Komisaun C hamutuk ho Vise Ministra Finansas no tékniku sira hosi Ministériu Finansas finaliza ona redasaun bá testu proposta lei ne’e tomak no horisehik lorokraik kedan ami envia bá Prezidente Parlamentu Nasionál, Maria Fernanda Lay,” Cedeliza Faria dos Santos hateten iha PN, Kinta (21/12/23).

Lee Mós: OJE 2024 Billaun $1.95 Aprova iha Finál Globál, Alkatiri ho FRETILIN Vota Kontra

Komisaun C fiar katak, ohin PPN Maria Fernanda Lay envia ona bá Prezidente Repúblika hodi halo promulgasaun iha tempu badak.

Totál orsamentu tetu ne’e laiha mudansa maibé muda de’it maka iha ninia rúbrika sira tanba iha proposta tolu mak inpaktu direta bá mudansa bá iha rubrika ne’e.

Nia sita katak, Parlamentu Nasionál rasik iha mudansa iha saláriu vensimentu bá bens no servisu, iha mós mudansa bá Ministériu Petróliu minarai nian hosi bens no servisu bá Kapitál Menór no mós iha institutu IGE mudansa iha bens no servisu bá saláriu vensimentu.

“Tanba ne’e mak iha rúbrika tolu ne’e iha mudansa maibé laiha impaktu iha tetu totál mantein billaun $1.95,” deputada ne’e subliña.

Prezidente Komisaun Ciha esperansa katak, Prezidente Repúblika sei halo promulgasaun bá OJE 2024  iha tinan 2023 ne’ebé pasa ona iha votasaun Finál Globál no sei Publika iha Jornál Repúblika atu  bele ezekuta iha tinan foun mai.

Jornalista Estajiária: Zita Menezes