Bankada FRETILIN Husu Halo Reflesaun no PPN Fernanda Lay Husu Korrije Ida-Idak Nia Atitude

Hatutan.com, (22 Dezembru 2023), Díli—Membru Parlamentu Nasionál hosi  Bankada FRETILIN Antoninho Bianco, husu Governu, Parlamentu Nasionál (PN) ho sosiedade sivíl halo reflesaun iha tempu natal no tinan foun hodi servi povu ho hahalok di’ak.

Lee Mós: Xanana Husu Deskulpa bá Lia-fuan Estupida, Deputada CNRT ho Tékniku Bankada FRETILIN Sadik-Malu

Votasaun bá Orsamentu Jeral Estadu (OJE) tinan 2024 iha Parlamentu Nasionál (PN) Jeneralidade, Tersa (12/12/2023). Foto/Tome da Silva.

“Ha’u hanoin tempu agora halo reflesaun ida karik. Bankada FRETILIN husu ita hotu atu halo reflesaun, hahu hosi órgaun soberanu sira halo reflesaun, nai ulun sira halo reflesaun, deputadu sira no Governu sira mós halo reflesaun, sosiledade sivíl halo reflesaun. Nune’e, Bankada FRETILIN hakarak hato’o feliz natal 2023, hein katak ho natal ne’e ho espiritu ne’ebé foun hodi lori ita tama bá tinan foun 2024 ho espiritu foun hodi ita servi bá malu, servi entre órgaun soberanu sira bele kordena servisu ho diak liután ho linguajen no hahalok ne’ebé maka diak,” Deputadu  Antoninho Bianco haktuir iha Plenária PN, Sesta (22/12/2023).

Antoninho Bianco hatutan, asaun sira ne’e servi bá Maromak tanba buat hotu ne’e provijóriu, laiha buat ida maka atu permanente no Bankada FRETILI hato’o mós feliz natal no ksolok tinan foun bá povu tomak, sosiedade sivil, órgaun responsavel no orgaun soberanu sira hotu.

Iha fatin hanesan Prezidente Parlamentu Nasional (PPN), Maria Fernada Lay, hateten ema hotu sala na’in no aproveita na festa natalisia halo reflesaun, no espera katak ho reflesaun  bele kurize ida-idak nia atitude iha tinan oin.

“Liu-liu bá pontualidade ne’e importante tebes tanba povu presija ita-nia servisu, entaun sé mai ho pontualidade hodi bele halo servisu, ne’ebé hanoin efisiénte, efikásia no badinas bá tinan oin,” Maria Fernanda Lay haktuir.

Jornalista Estajiária : Zita Menezes