Hafoin kapturasaun, ekipa transporta kedan suspeitu sira bá iha Kuartel Jerál PNTL iha Caicoli hodi halo prossesu identifikasaun no investigasaun. Hosi rezultadu ne’e identifika katak, suspeitu na’in-lima de’it mak sai hanesan autór prinsipál.
Advertisement
“Suspeitu sira ne’e agora daudaun detein hela iha sela polísia Komandu munisípiu Díli no sei aprezenta bá Ministériu Públiku,” Xefe Departamentu Investigasaun Kriminál Nasionál, Superintendente Polísia João Belo dos Reis, hateten liuhosi konferénsia imprénsa iha kna’ar fatin, Kuartel Jerál PNTL Caicoli, Kinta (28/12/2023).
Suspeitu sira ne’ebé mak oras ne’e detein ona iha sela ho identidade inisial HL idade 16, SNRC idade 17, VCV idade 16, KM idade 19 no FGS idade 20.
Motór sira ne’ebé PNTL sita hosi grupu organizadu ne’ebé deskonfia durante ne’e na’ok motór iha Dili laran no assegura hela iha Kuartél Jerál PNTL Caicoli, Kinta (28/12/2023). Foto: Tomé da Silva.
Hosi suspeitu na’in-lima ne’e, forsa konjunta mós detekta inklui kaer ona na’in bá ofisina ida ka bengkel, ne’ebé mak durante sempre modifika motór sira ne’ebé mak joven sira ne’e na’ok lori bá sira.
Superintendente Polísia João Belo dos Reis dehan, sira ne’e hotu sei tama hotu iha prosesu investigasaun atu bele kriminaliza bainhira iha duni evidénsia forte.
Departamentu investigasaun kriminál mós sei bolu inan-aman hosi joven sira ne’e hodi bele responsabiliza, tanba inan-aman la sosa motór, maibé oan sira sa’e motór, inan-aman sira nonook.