Kaderneta Pasaporte Hotu, MJ Garante Estoke Foun Sei To’o TL iha Tempu Badak

Hatutan.com (03 Janeiru 2024), Díli—Ministériu Justisa (MJ) liu hosi Diresaun Jerál Servisu Rejistu Notariadu (DGSRN), anunsia ona katak, hahú loron 03 Janeiru 2024, atendimentu komún bá pasaporte sei taka tanba estoke kaderneta hotu.

Diretór Jerál Servisu Rejistu Notariadu, João Fernando Martins Borges. Foto: Tome da Silva.

Diretór Jerál Servisu Rejistu Notariadu, João Fernando Martins Borges rekoñese katak, bazeia bá publikasaun ne’ebé mak iha, estoke pasaporte hamutuk 16.000 iha Servisu Notariadu hotu ona.

Lee Mós: Dudu-Malu To’o Balun Kanek, MJ Husu Sidadaun Sira bá Trata Pasaporte Iha Munisípiu

“Ha’u hakarak informa bá públiku katak, avizu ne’e ha’u maka taka duni, tanba kaderneta pasaporte mamuk ona. Entaun, hahú ohin atendimentu laiha no bá sira ne’ebé  mak atu  foti pasaporte iha loron 9-12 janeiru, ami  labele fó tanba estoke mak mamuk ona,” João Fernando Martins Borges hateten bá jornalista Hatutan.com, iha  knaar  fatin, Kuarta (03/01/2024).

Kontratu ne’ebé  Ministériu Justisa halo ho kompañia,  prodús hamutuk 73.550 kaderneta, hosi  númeru  ne’e mai ona Timor  Leste (TL) hamutuk 16.048 no sei hela 57.150 mak seidauk mai.

“Hosi númeru 57.150 pasaporte ne’e, ha’u lakohi dehan data fixu bainhira mak mai, maibé bainhira to’o TL nia parte sei  informa fali  bá públiku, no garante  katak sei to’o iha tempu badak nia laran,” nia hateten.

Diretór ne’e hato’o katak, depois de estoke kaderneta pasaporte ne’e tama, sidadaun barak mak kada loron mai  trata dokumentu, maibé  tanbá agora daudaun laiha  duni ona no hein  estoke  foun  tama  mak foin  loke  fali  atendimentu bá públiku.

Durante loron ha’at, hahú hosi loron 21-23 no loron 27 fulan Dezembru  2023 abitante hamutuk 1.000-resin,  la konsege foti sira nia  pasaporte tanba kaderneta hotu, maibé  depois Servisu Rejistu Notariadu sei ko’alia  ho  sira  oinsá atu  hein  pasaporte  foun tama mak foti.

“Totál sidadaun 1.240 mak sei  iha hela  sistema nia  laran seidauk konsege print sai. Entaun, ita  hein bainhira kaderneta pasaporte foun tama fali mak ita print uluk  sira  nian,” nia tenik.

Jornalista: Gloria Maia