Bispu Eméritu Dioseze Atambua Mgr Antonius Pain Ratu, SVD Remata Peregrinasaun iha Mundu ho Idade 95

Hatutan.com, (07 Janeiru 2024), Díli— Novidade tristeza hafalun sarani Katólika iha Provínsia Nusa Tenggara Timur (NTT, Indonézia tanba bibi-atan domin na’in, Bispu Eméritu Dioseze Atambua, Mgr. Antonius Pain Ratu, SVD husik iis iha tuku 10.45, Sábadu 6 Janeiru 2024 ho idade 95.

Bispu Eméritu Dioseze Atambua, Mgr. Antonius Pain Ratu, SVD. Foto: Espesiál.

Tuir publikasaun média online Lintaspewarta.com ne’ebé Hatutan.com sita hateten, maktoban husik iis iha Hospitál Públiku Atambua tanba sofre moras balun no mós kestaun idade.

Lee Mós: Mgr. José António da Costa Remata Peregrinasaun iha Mundu

Antes ne’e iha loron 2 Janeiru 2024, Bispu Eméritu Dioseze Atambua, Mgr Anton Pain Ratu, SVD selebra ninia aniversáriu moris nian bá dala-95.

Iha publikasaun média online ne’e sita katak, selebrasaun aniversáriu natalísiu ne’e ho misa agradesimentu ne’ebé prezide hosi atuál Bispu Dioseze Atambua, Mgr. Dr. Dominikus Saku, Pr iha Kapela Santa Maria Bitauni-TTU.

Bispu Eméritu Dioseze Atambua, Mgr. Antonius Pain Ratu, SVD moris iha loron 2 fulan janeiru 1929 iha illa Adonara, Flores Leste ne’ebé husik iis ho idade 95 loron 4.

Iha loron 17 Agostu 1958 simu ordenasaun Saserdotál, no husik iis ho idade saserdósiu nian bá dala 66.

Iha loron 21 fulan Setemrbu 1982 simu Konsagrasaun Episkopál, nune’e husik iis ho tinan 42 fulan tolu, semana rua loron 1 hanesan Bispu.

Iha loron 2 fulan Juñu tinan 2007 hahú deskansa iha Bitauni hanesan Bíspu Eméritu, no husik iis iha loron 6 fulan Janeiru 2024.*