Índia Hakarak Kapasita Rekursu Umanu TL

Hatutan.com, (10 Janeiru 2024), Díli— Governu Indianu prontu tulun Timor-Leste (TL) iha área dezenvolvimentu, liu-liu bá kapasitasaun rekursu umanu, tekonolojia IT, saúde inklui fornese ai-moruk tradisional no farmaseutíka.

Primeiru Ministru Índia, Shri Narendra Mondi hasoru-malu ho Prezidente Repúblika (PR), José Ramos-Horta iha Gandhinagar Índia iha ámbitu iha simeira Gujarat bá dala 10, Kuarta (09/01/2024). Foto: Média PR.

Primeiru Ministru Índia, Shri Narendra Mondi deklara prontidaun ne’e bainhira hasoru-malu ho Prezidente Repúblika (PR), José Ramos-Horta iha Gandhinagar Índia iha ámbitu iha simeira Gujarat bá dala 10.

Lee Mós: Ramos-Horta Semo bá Índia Partisipa Vibrant Gujarat Global Summit 2024

Sorumutu Líder na’in-rua ne’e hanesan primeira vizita Estadu no Governu nian entre nasaun rua Timor-Leste no Repúblika Índia.

Ramos-Horta agradese bá Primeiru Ministru Mondi nia Konvite hodi bele partisipa iha Simeira ida-ne’e, atu bele alkansa prioridade sira, Xefe estadu husu mós Governu Índia atu fó apoiu Timor-Leste, liu-liu iha área Saúde no reforsa kapasitasaun IT.

“Primeiru Ministru Índia Shri Narendra Mondi komprometidu katak, sei tulun Timor-Leste iha área dezenvolvimentu, kapasitasaun rekursu  umanu, tekonolojia IT, saúde inklui fornese ai-moruk tradisionál no farmaseútika,” Hatutan.com sita Komunikadu, Kuarta (09/01/2024).

Prezidente Repúblika hateten sei apoia maka’as ba Índia nia misaun permanente iha membru Konsellu Seguransa ONU nian.

Xefe Governu Mondi fó mos apresiasaun ba Timor-Leste nia partisipasaun ativu iha edisaun daruak Simeira Voz Sul Globál nian (Voice of Global South Summit) no konkorda katak nasaun hotu-hotu ne’ebé hamahan-an iha “Global South Summit” ne’e, tenke reforsa pozisaun iha kestaun Globál.

Primeiru Ministru Mondi mos Felisita Prezidente Horta kona-ba desizaun Prinsipiu ASEAN nian hodi rekoñese Timor-Leste nu’udar membru ba dala 11 no nia espera katak Timor-Leste nia adezaun ne’e, bele alkansa iha tempu badak.

Relasaun Bilaterál Timor-Leste no Índia ho valor demokrasia no pluralidade ne’ebé hanesan. India mak nasaun primeiru ne’ebé estabelese relasaun diplomátika desde tinan 2003.

Lee Mós: Índia Apoia Totál Adezaun TL bá ASEAN

Jornalista: Vito Salvadór