Kada Fulan Prezidente Autoridade Munisipál Simu $1.750

Hatutan.com, (10 Janeiru 2024), Díli—Governu liuhosi sorumutu ordináriu Konsellu Ministrus nian, iha Kuarta 10 janeiru, aprova projetu Dekretu Governu ne’ebé aprezenta hosi Ministru Administrasaun Estatál (MAE), Tomás do Rosário Cabral, ne’ebé estabelese remunerasaun bá Prezidente Autoridade Munisipál sira.

Reuniaun Konsellu Ministru (KM), iha Kuarta (10/01/2024). Foto: Elio dos Santos da Costa.

Diploma ida-ne’e prevee ona iha númeru 2 hosi artigu 24.º Dekretu-Lei n.3/2016, loron 16 fulan-marsu, tuir redasaun ne’ebé aprezenta hosi Dekretu-Lei n.84/2023, loron 23 fulan-novembru, hodi estabelese remunerasaun bá Prezidente Autoridade Munisipál sira haree bá grau responsábilidade no sei fó impulsu bá prosesu desentralizasaun territoriál, ne’ebé sei implika aumentu bá rekursus materiál, orsamentál no umanus ne’ebé sei koloka  iha sira-nia responsabilidade.

Lee Mós: Saláriu bá Sekretáriu Administrasaun Suku $170 no Ofissiál Sira $150

“Nune’e, Prezidente Autoridade Munisipál sei iha direitu bá remunerasaun mensál ilíkida ho valór $1.750,” Hatutan.com sita komunikadu.

Iha komunikadu ne’e mós sita katak, dekretu Governu ida-ne’e sei tama iha vigór iha loron tuir mai hafoin ninia publikasaun no sei hahú vigora iha loron 1 fulan-janeiru tinan 2024. 

Revoga ona Dekretu Governu n. 3/2016, loron 6 fulan-abril, ne’ebé altera hosi Dekretu Governu númeru 20/2021, loron 11 fulan-agostu.

Reuniaun Konsellu Ministrus iha Palásiu Governu ne’e prezide hosi Primeiru Ministru (PM), Kay Rala Xanana Gusmão.

Jornalista: Rogério Pereira Cárceres