TL Avansa Pasu Ida Investe Ai-han Nutritivu Espesializadu Atu Kombate Ra’es Badak

Hatutan.com, (13 Janeiru 2024), Díli—Ministériu Saúde Timor-Leste (MS) ho Organizasaun Nasoens Unidas hamutuk ho Programa Alimentár Mundiál (PAM) asina ona akordu hodi sosa estoke Ai-han Nutritivu Espesializadu (SNF – sigla inglés), hodi kombate malnutrisaun bá inan isin-rua no inan fó-susu sira.

Modo nutritivu. Foto: Google.

Osan ho valór $600,000 apoiu hosi Ministériu Saúde, sei permite PAM atu sosa tonelada métrika 380 iha tinan 2024.

Lee Mós: Banku Mundiál: Timor-Leste Nia Kreximentu PIB Atrazu iha Nivel Rejionál

“Produtu hirak-ne’e sei distribui hosi Ministériu Saúde atu responde no jere problema malnutrisaun aguda no krónika no sei fó benefísiu ba inan isin-rua no inan fó-susu sira liu 10,000 iha munisípiu 13 ne’ebé mak hasoru hela lakuna ai-han nutritivu,” Hatutan.com sita komunikadu.

Ministra Saúde, Élia A.A. dos Reis Amaral konsidera fornesimentu ai-han nutritivu liu hosi Sentru Saúde Komunitária, Governu Timor-Leste sei hasa’e nutrisaun ba inan isin-rua no inan fó-susu iha tempu krítiku iha sira-nia oan nia dezenvolvimentu.

Inisiativa ne’e reprezenta pasu ida ba oin ba estratéjia Timor-Leste nian hodi kombate malnutrisaun krónika no alkansa objetivu halakon hamlaha iha tinan 2030.

“Feto no labarik-feto sira ho idade reprodutiva hasoru problema boot ho lakuna ai-han nutritivu iha rai-laran. Ida-ne’e aumenta mós ho impaktu hosi COVID-19, kustu ai-han ne’ebé aas no mudansa klimátika derrepente, ne’ebé tau feto iha risku aas ba malnutrisaun,” Reprezentante PAM ba Timor-Leste, Alba Cecilia Garzon Olivares, hateten.

PAM haksolok ho parseria ho Ministériu Saúde atu ajuda rezolve lakuna ida-ne’e no suporta futuru ida-ne’ebé saudavél liu bá inan no labarik sira iha Timor-Leste.

Organizasaun Nasoens Unidas ba Programa Alimentár Mundiál hanesan organizasaun umanitáriu boot liu ne’ebé salva vida iha tempu emerjénsia no utiliza asisténsia alimentár hodi harii dalan bá dame, estabilidade no prosperiedade bá ema sira ne’ebé mak foin rekupera hosi konflitu, dezastre no impaktu mudansa klimátika.

Lee Mós: Timor-Leste iha Problema Sériu Má-Nutrisaun no Labarik Ra’es-Badak

Jornalista Estajiária: Zita Menezes