Desportu
AD SLB Laulara Okupa III Lugar iha Timor Cup 2023, Kay Olok Mellór Markadór
Hatutan.com, (15 Janeiru 2024), Díli—Klube Futeból Timor-Leste AD SLB Laulara sai hanesan man’an na’in terseiru (III) lugar iha finál taxa Timor Cup 2023 no Jogadór estrela Kay Olok Gusmão sai hanesan mellór markadór ho golu neen.
Serimónia simu prémiu hafoin Klube Futeból Timor-Leste AD SLB Laulara sai hanesan man’an na’in terseiru (III) lugar iha finál taxa Timor Cup 2023 no Jogadór estrela Kay Olok Gusmão sai hanesan mellór markadór ho golu neen. Foto: AD SLB Laulara.
Iha jogu taxa Timor Cup 2023, ekipa Futeból Northen Crocs mak Sai hanesan Kampiaun no ekipa Futeból Casuarina Darwin okupa Segundu Lugár, enkuantu Klube estimadu públiku Laulara AD SLB Laulara hetan terseiru lugár.
Lee Mós: Timor Cup 2023, AD SLB Laulara Derrota Hasoru Northern Crocs
Kapitaun AD SLB Laulara, Efren Santos agradese ba Komisaun Organizadora taxa Timor Cup 2023 ne’ebé fasilita kondisaun hotu hodi realiza jogu amizade entre klube oin-oin hosi nasaun sira hodi bele hametin unidade no buka aprende no fahe esperiénsia ba malu durante jogu to’o remata.
“Agradese tebes bele reprezenta Timor-Leste mai iha jogu Timor CUP ne’e hodi aprende no fahe esperiénsia ba malu, maski mosu situasaun balun, maibé ita hotu mantein dixiplina iha jogu maski ita hakarak manan, maibé ita manan ou lakon ida ne’e jogu hodi buka esperiénsia. Ekipa AD SLB agradese ba adeptu hotu ne’ebé fó ona apoiu hosi Austrália no Timor-Leste,” Hatutan.com sita deklarasaun Efren Santos iha komunikadu.
Kapitaun ekipa ne’e ori ekipa nia naran, agradese ba Prezidente AD SLB, Kay Rala Xanana Gusmão, señora Kirsty Sword Gusmão ne’ebé fasilita ona kondisaun hotu ho di’ak durante jogu.
Nune’e mós Señora Kirsty Sword Gusmão mós agradese tebes ba ekipa Timor CUP inklui mós jogador tomak hosi AD SLB Laulara bele hetan terseiru lugar.
Fundadora Sala Leitura Xanana Reading Room no Fundasaun Alola ne’e akompaña mós Kay Olok Gusmão hamutuk ho kolega jogadór tomak AD SLB ba simu taxa.
Durante jogu klube hamutuk 8 maka reprezenta nasaun idak-idak hodi hola parte iha jogu ne’e. Serimónia fahe taxa no medulla ba manan-na’in sira hala’o iha Kampu Futeból, Melbourne-Austrália partisipa direta hosi ema atus ne’ebé fó suporta sira nia klube idak-idak.
“Ha’u orgullu tebe-tebes ba jogadór sira hosi AD SLB Laulara hetan terseiru lugar. Agradese ba ekipa sira no Kay Olok hetan mós prémiu nu’udár jogadór ho golu barak liu. Ha’u hein ekipa kontinua aprende esperiénsia di’ak hosi jogu ne’e hodi dezenvolve desportu iha Timor-Leste,” Kirsty Gusmão iha nia página Facebook.
Prezidente Timor CUP 2023, Seza dos Santos hato’o agradese bá klube Futeból hotu-hotu ne’ebé partisipa iha taxa Timor Cup 2023.
Tuir planu, segunda ohin (15/01/2024), ekipa Jogadór AD SLB Laulara fila hikas mai Timor-Leste ho rute liu hosi Bali to’o Timor-Leste ho aviaun Aero Dili.
Jornalista: Vito Salvadór