Projetu Dekretu Governu Kona-bá Ezekusaun OJE 2024 Aprovadu

Hatutan.com, (15 Janeiru 2024), Díli— Reuniuan Konsellu Ministru (KM) Estraordináriu iha Palásiu Governu, Dili aprova Projetu Dekretu Governu, kona-bá Ezekusaun Orsamentu Jerál Estadu (OJE) bá tinan 2024, ne’ebé aprova hosi Lei númeru  21/2023, loron 27 fulan-Dezembru.

Reuniaun Konsellu Ministru (KM), iha Kuarta (10/01/2024). Foto: Elio dos Santos da Costa.

Projetu Dekretu Governu ne’e aprezenta hosi Ministra Finansas, Santina José Rodrigues F. Viegas Cardoso ho objetivu atu estabelese regra kona-bá ezekusaun Orsamentu Jerál Estadu ba tinan 2024.

Lee Mós: Prezidente Repúblika Promulga OJE 2024 Billaun $1,95

“Iha tinan 2024, sei konklui desentralizasaun funsaun pagamentu, ho servisu no entidade hotu ne’ebé ho autonomia finanseira alargada ne’ebé assume hodi halo ninia pagamentu rasik, ho exesaun pagamentu remunerasaun sira, ne’ebé kontinua halo hosi Diresaun-Jerál Tezouru,” Hatutan.com sita komunikadu, Segunda (15/01/2024).

Mudansa ida-ne’e sei permite Diresaun-Jerál Tezouru konsentra iha atribuisaun jestaun tezouraria no monitorizasaun ezekusaun orsamentál nian, ne’ebé nu’udár melloria kualitativa importante ida iha jestaun finansas públikas.

Diploma ne’e mós halo ajuste ki’ik iha prosedimentu ezekusaun orsamentál nian, tuir revizaun ba Lei númeru 2/2022, loron 10 fulan-fevereiru, liuliu kona-bá alterasaun orsamentál.

Aleinde ne’e Konsellu Ministru mós aprova projetu Rezolusaun Governu ne’ebé aprezenta hosi Vise-Ministra solidariedade Sosiál no Inkluzaun, Céu Brites, kona-bá Ezonerasaun Longuinhos Armando S. I. Leto hosi kargu Prezidente Konsellu Administrasaun Institutu Nasionál Seguransa Sosiál, tanba ne’e mós Prezidente Konsellu Fundu Rezerva Seguransa Sosiál.

Jornalista: Rogério Pereira Cárceres