Prezidente Repúblika Hato’o Kondolénsia bá Falesimentu Ministru Justisa Amândio de Sá Benevídes

Hatutan.com, (22 Janeiru 2024), Díli—Prezidente Repúblika (PR), José Ramos-Horta hato’o sinseru kondolénsia ho domin bá familia no IX Governu Konstitusionál ne’ebé lakon ona Ministru Justisa, Amândio de Sá Benevídes.

Ministru Justisa, Amândio de Sá Benevídes, hala’o reuniaun ho Prezidente Repúblika, José Ramos-Horta iha Palásiu Prezidensiál Bairru-Pité, Segunda (18/12/2023), hodi ko’alia kona-bá preokupasaun traballadores Timor oan iha rai estranjeiru hanesan UK, relasiona ho problema pasaporte. Foto: Média Ministériu Justisa.

“Ha’u-nia sinseru kondolénsia bá família tanba Ministru Justisa Amândio de Sá Benevídes mate derrepente de’it. Kondolénsia mós ba IX Governu Konstitusionál,” Hatutan.com sita publikasaun Prezidente Repúblika iha pájina ofisiál Facebook José Ramos-Horta, Sábadu (20/01/2024).

Lee Mós: Ministru Justisa, Amândio dé Sa Benevídes Husik-iis ho Idade 60 Tanba Atakasaun Fuan 

Iha publikasaun ne’e Xefe Estadu dekreve oitoan kona-bá oinsa koñese Matebian ninia família, katak, irmaun Benevides sira nia família, nia mau-alin Francisco no Evaristo mate tiha ona.

Ramos-Horta sita katak, matebian Amândio de Sá Benevídes nia aman, liurai Benevídes dé Maubisse, haka’as an atu eduka ninia oan hotu.

“Ami kolega, sira iha misaun Katólika Soibada. Liurai mak figura ida-ne’ebé folin-boot no respeitu tebes. Ha’u hala’o sorumutuk servisu ho Ministru Amândio ne’ebé sempre aten-barani no koko atu rezolve problema hotu ne’ebé nia hasoru. Triste tebes. Lakon boot ba Timor-Leste,” espresaun triste hosi Ramos-Horta.

Xefe Estadu sente lakon servidór Estadu ida ne’ebé ho matenek no dedikasaun tomak, servisu bá povu Timor-Leste desde nasaun ne’e restaura ninia independénsia iha 20 de Maiu 2002.

Jornalista: Vito Salvadór