Tripulante Ró Berlin Ramelau ho Nakroma Fa’an Mós Tiketi ho Folin US$ 50 Kada Viajen

Hatutan.com, (22 Janeiru 2024), Díli– Membru Parlamentu Nasionál hosi Bankada PD, Maria Teresa Gusmão, identifika iregularidade iha operasaun Ró Berlin Ramelau ho Nakroma, tanba durante ne’e  tripolante sira iha ró refére  faan mós tiketi bá pasajeiru sira ho folin $50 kada viajen.

Lee Mós: MTK Husu F-FDTL Apoia Tripulante Bá Operasaun Berlin-Ramelau

Ró Berlin Ramelau. Foto/Dok.Hatutan.com.

“Iregularidade ruma ne’ebé akontese iha Ró Berlin Nakroma no Berlin Ramelau tuir informasaun ne’ebé ami asesu katak tripolante Ró Berlin Nakroma no Berlin Ramelau halo atvidade negosíu faan tiketi  bá pasajeiru maské ró sira hanesan propriédade Estadu nian,” Deputada Maria Teresa Gusmão haktuir iha nia intervensaun iha plenária PN, Segunda (22/01/2024).

Nia dehan,  maioria tripolante sira ne’ebé halo negosíu ne’e hosi Indonézia inklui mós tripolante Timor oan balu.

Deputada Maria Teresa Gusmão subliña katak Ró Berlin Ramelau nia kontratu la fó autorizasaun bá tripolante sira atu faan tiketi bá pasajeiru sira, maibé tripolante sira la preokupa no pesoál APORTIL sira mós hatene no haree hela, maibé halo finji la hatene buat ida.

“Tuir informasaun tripolante sira ne’ebé toba iha kuartu Óspital nia mós faan kuartu refére bá pasajeiru, maské sasan médikamentu nakonu hela no fatin ne’e mós uza bá atendimentu ema moras nian, maibé sira utilizá hodi uza hotu bá negosíu. Kada kuartu bá tripolante sira fó aluga bá pasajeiru sira ho montante $50 bá kada viajen, maské tripolante sira ne’e hetan vensimentu besik $2.000 no balu liu $2.000,” nia hateten.

Tuir loloos Ró ne’e propriédade estadu nian ema hirak ne’ebé servisu iha Ró ne’e hetan saláriu mensál. Tanba ne’e laiha razaun atu faan ka fó aluga kuartu bá pasajeiru sira, kuartu ne’e tripolante sira uza hodi deskansa di’ak nune’e bele asegura Ró nia viajen sira ne’ebé sira hala’o.

Membru Parlamentu Nasionál PN  ne’e husu bá Comissão Anti-Corrupcão (CAC) no Polísia Nasionál Servisu Investigasaun Kriminál (PNSIK) ho Ministériu kompetente ka komisaun Parlamentu Nasionál atu haree kestaun ida-ne’e ho sériu atu labele akontese tán iha instituisaun Estadu nian.

Reprezentante IX Governu Konstitusionál iha Parlamentu Nasionál Vise-Ministru asuntu parlamentár, Áderito da Costa Hugo seidauk fó resposta bá asuntu refére  parente plenária PN nian.

Jornalista Estajiária : Zita Menezes