Ramos-Horta Sai Oradór Prinsipál iha “Youth and Leaders Summit” Fransa

Hatutan.com, (27 Janeiru 2024), Díli—Prezidente Repúblika (PR), José Ramos-Horta sai oradór prinsipál iha “Youth and Leaders Summit“ (SiensiaPo) ne’ebé organiza hosi Paris School of International Affairs.

Ramos-Horta konversa ho Arancha Gonzalez, Diretora Paris School of International Affairs iha konferénsia SiensiaPo “Youth and Leaders Summit 2023”. Foto: Vito Salvadór.

Iha “Youth and Leaders Summit“ ne’e partisipante mai hosi nasaun oin-oin no Tema ne’ebé sai hanesan topiku prinsipál maka “Next Generation Shaping the Future” no Sorumutu ida-ne’e sai hanesan plataforma dinámika ida atu promove diálogu, kolaborasaun no troka ideia sira kona-bá assuntu globál ne’ebé importante tebes.

Lee Mós: Ramos-Horta husu Fransa Apoia Timor-Leste

Sorumutu ne’e loke direta hosi Diretora Paris School of International Affairs (PSIA) Arancha Gonzalez, ne’ebé mós hanesan moderadora b’a Konferénsia ne’e no konvidadu espesiál iha Serimónia ne’e maka Prezidente Timor-Leste, José Ramos-Horta, hamutuk ho Eis-Prezidente Xile Michelle, nu’udár eis Diretór Ezekutivu UN Women; eis Komisáriu Aas Nasoins Unidas nian ba Direitus Umanus.

Iha Sumáriu Ezekutivu kona-bá “Youth and Leaders Summit” no Konferénsia SiensiaPo, Organiza tinan-tinan hosi Eskola Paris School of International Affairs (PSIA).

Konferénsia “Youth and Leaders Summit” iha Paris ne’e hanesan eventu ida-ne’ebé halibur lider foin-sa’e sira, péritu sira ne’ebé naran-boot no foti desizaun influénsia hosi área oioin atu halibur-malu hodi troka ideia no hakle’an diskusaun kona-bá tópiku oin-oin ne’ebé lori benefísiu bá sosiedade.

Sorumutu ida-ne’e sai hanesan plataforma dinámika ida atu promove diálogu, kolaborasaun no troka ideia sira kona-bá assuntu globál ne’ebé importante.

Durante Prezidente Repúblika José Ramos-Horta nia intervensaun hateten, foin-sa’e mak esperansa foun bá nasaun, tenke hola papél ida importante iha sosiedade hodi hametin unidade, domin no dame.

“Foin-sa’e sira, imi sei harii futuru ida no imi bele sai ema ida iha imi-nia nasaun ka iha Arena Internasional. Tan ne’e, labele lakon  imi nia fiar, halo tuir buat ne’ebé imi fiar. Hakbesik ba ema seluk no halo imi sai forte liu, no imi tenke hatete ida-ne’e ba imi nia an loroloron,” Ramos-Horta hateten.

Iha mundu ohin loron dalaruma difisil no laiha ema ida mak rona líder foin sa’e sira, maibé pelumenus iha esperansa no koko atu halo buat barak atu troka situasaun no ida-ne’e mak ema barak ne’ebé koko atu halo buat barak iha eskritóriu no fatin ne’ebé sira hakna’ar an bá.

Jornalista: Vito Salvadór