Hatutan.com (30 Janeiru 2024), Díli—Oras ne’e daudaun Igreja Timor-Leste (TL) ho IX Governu Konstitusionál kontinua halo diskusaun kona-bá preparasaun haodi hein data ixu hosi Vatikanu kona-bá vizita Papa Frencisco mai TL ne’ebé antes ne’e fó-sai ona katak, sei realiza iha Agostu tinan ida ne’e.
Arsebispu Arkedioseze Metropolitana Díli, Dom Virgílio Kardeál do Carmo da Silva, SDB.
Arsebispu Arkedioseze Metropolitana Díli, Dom Virgílio Kardeál do Carmo da Silva, SDB hateten, seidauk iha data serteza bá vizita ne’e no Igreja Timor ho Governu sei hein konfirmasaun ikus hosi Vatikanu.
“Hanesan imi hotu rona no ko’alia, maibé ita sei hein hela konfirmsaun kona-bá loron no data seidauk fixu. Ne’ebé ita hein hela,” Dom Virgílio hateten iha salaun UCT Balide, Díli, Tersa (30/01/2024).
Advertisement
Kona-bá preparative sira atu simu vizita Papa Frencisco nian, Arsebispu ne’e dehan, nai-lulik idak-idak hatene hela ninia pozisaun, nune’e bainhira data ne’e loos ona hein katak buat hotu-hotu sei la’o loos.
“Tanba ne’e, komunikasaun hosi Governu ho Igreja iha. Maibé, konfirmasaun ne’e hosi ne’ebá. Nune’e ita iha ne’e prepara de’it,” nia hateten.
Bainhira iha hela faze hein konfirmasaun ikus, entaun parte Arkedioseze ka Igreja Timor seidauk bele fó sai buat hotu-hotu bá públiku kona-bá saida mak halo ona no saida mak seidauk halo no ekipa prepara oinsa.
Iha loron 10 fulan Janeiru tinan 2024, Radio Veritas Asia (RVA) fó-sai katak, posibilidade Papa Francisco sei hala’o vizita bá nasaun haat iha Ázia mak hanesan Indonézia, Singapura, Timor-Leste (TL) no mós Papua Nova Giné iha fim fulan Agostu tinan ne’e.