Uma 130 Hetan Estragu, Hafoin Udan-Anin Semana Ida iha Territóriu Nasionál

Hatutan.com, (05 Fevereiru 2024), Díli-Sekretária Estadu Protesaun Sívil (SEPS) liuhosi Autoridade bá Protesaun Sívil (APC-sigla portugés) relata katak, komunidade sira-nia uma hamutuk 130 hetan estragu, hafoin akontesimentu udan no anin-boot ne’ebé akontese durante semana (30 fulan-Janeiru to’o 05 fulan-Fevereiru 2024) iha territóriu nasionál.

Lee Mós: Inundasaun iha Díli, APC Assegura Vítima 100-resin

Uma ida hetan estragu hosi udan no anin-boot, foin lalais ne’e. Foto/APC

“Hahú hosi loron 30 fulan-Janeiru to’o loron 05 fulan-Fevereiru 2024, durante semana ida ne’e, iha territóriu nasionál, normál akontese tipu dezastre ne’ebé maka SOP-APC rejista uma-kain 130 mak hetan estragus,” portavós APC, Cesário da Silva Marques, informa bá jornalista sira liuhosi konferénsia imprénsa iha kna’ar fatin Caicoli, Segunda (05/02/2024).

Uma 130 ne’ebé hetan estragu ne’e, rezultadu hosi dezastre naturál sira iha Munisipiu Aileu, anin sobu uma 4, Ainaro anin sobu uma 28, inklui inséndiu Urbadu 1. Iha Baucau anin sonu uma 1, Bobonaru uma 33, rai-halai 3, insendiu rubanu 2.

Iha Munisípiu Covalima, anin sonu uma 2, inséndiu urbanu 1, Ermera anin sobu uma 31, rai-halai 2, inséndiu urbanu 1. Munisipiu Lautem anin sobu uma 3, Liquiça anin sobu uma 14, Manufahi uma 1, Rejiaun Espesial Oecusse Ambeno (RAEOA), anin sobu uma 1, Viqueque anin sobu uma 13, inséndiu urbanu 1.

Oras ne’e dadauk Autoridade Protesaun Sívil nian iha munisípiu sira, konjunta ho parseiru relevante sira, oferese ona asisténsia emerjénsia bá família afetadu sira. Alende ne’e, ekipa sira mós halo dadauk hela rekollamentu dadus membru família kada uma-kain, sasán saida tán mak estragus, no uma hira mak sei tama iha tipu apoiu bá rekuperasaun ninian.

Jornalista: Rogério Pereira Cárceres