Governu Aprova Projetu Dekretu-Lei Kona-bá Rejime Estraodináriu bá Ajudikasaun Kontratu Públiku Sira

Hatutan.com, (06 Fevereiru 2024), Díli—Governu liuhosi sorumutu Konsellu Ministrus (KM) nian, aprova ona projetu dekretu-lei ida kona-bá rejíme estraordináriu bá ajudikasaun kontratu públiku sira, iha obra sira ne’ebé hahú tiha ona maibé laiha formalizasaun kontratu.

Projetu emerjénsia iha Mota Kasnafar.

Projetu Dekretu-Lei ne’e aprezenta hosi Ministru Obras Públikas (MOP), Samuel Marçal iha Palásiu Governu, Díli, Tersa 06 Fevereiru 2024.

Lee Mós: CAC Halibur Informasaun Liga ho Projetu Adjudikasaun Direta iha EDTL,E.P

“Konsellu Ministrus aprova projetu Dekretu-Lei ne’ebé aprezenta hosi Ministru Obras Públikas, Samuel Marçal ne’ebé ho objetivu atu estabelese rejime estraordináriu bá adjudikasaun kontratu públiku sira iha obra sira ne’ebé hahú tiha ona, maibé laiha formalizasaun kontratu,” Hatutan.com sita komunikadu.

Iha komunikadu ne’e esplika katak, inisiativa ida-ne’e mosu hanesan rezultadu hosi identifikasaun bá projetu hamutuk 44 ne’ebé ninia kontratu ezekusaun bá obras públikas seidauk iha formalizasaun, maski hetan ona aprovasaun hosi Konsellu Administrasaun Fundu Infraestrutura (KAFI) iha tinan 2017.

Hafoin deliberasaun KAFI nian, no maske seidauk iha formalizasaun, implementasaun ba projetu 44 balun ne’e hahú la’o ona.

Haree bá espetativa posível ne’ebé kria bá emprezáriu sira ne’ebé hahú ona servisu, no ho objetivu bá boa-fé, justisa, proporsionalidade, no protesaun tesidu emprezariál nasionál nian, Governu forma.

Aleinde análize bá obra sira ne’ebé hahú ona ho efetivu iha ámbitu projetu 44 ne’e, grupu traballu ne’e identifika mós kazu seluk ne’ebé obras hahú ona, maibé seidauk iha formalizasaun kontratu ho loloos, no inklui iha lista projetu sira ne’ebé inklui iha diploma ida-ne’e, liu-liu projetu lima iha área distribuisaun enérjia elétrika nian.

Ho projetu Dekretu-Lei ida-ne’e, sei estabelese rejíme estraordináriu ida bá adjudikasaun kontratu públiku atu konklui obras públikas ne’ebé hahú tiha ona, laiha formalizasaun antes hosi kualkér kontratu públiku.

Valór referénsia ne’ebé sei uza sei korresponde bá presu unitáriu ne’ebé estabelese liuhosi avaliasaun Ajénsia Dezenvolvimentu Nasionál IP (ADN) nian, hodi reflete bá valór merkadu ne’ebé aplikável bá servisu tipu ida-ne’e. Konsellu Ministrus mak iha kompeténsia atu aprova despeza kona-bá kontratu ezekusaun bá obras tuir relatóriu ne’ebé prepara hosi AND.

Sei inklui ho diploma ida-ne’e bá projetus ne’ebé iha ona grau ezekusaun, hafoin avaliasaun bá kualidade no valór hosi ADN ne’e rasik. Prosesu avaliasaun ne’e envolve etapa sira hanesan avaliasaun bá kualidade projetu, serbisus ne’ebé halo hosi empreteiru sira, elabora relatóriu no submete bá CAFI hodi hetan aprovasaun.

Presiza konsidera katak, diploma ida ne’e aplika deit ba projetus ne’ebé hahú tiha ona, no hatuur ona iha tabela ne’ebé aneksa iha diploma ida ne’e.

Jornalista: Rogério Pereira Cárceres