PN Levanta Preokupasaun Povu Ermera Kona-bá Estrada no Ponte

Hatutan.com, (06 Fevereiru 2024), Díli— Deputadu Ermera-oan iha Parlamentu Nasionál (PN), levanta preokupasaun povu Ermera liuliu kona-bá kondisaun estrada ne’ebé grave tebes iha munisípiu ne’e tomak inklui ponte laiha atu fasilita estudante no populasaun hosi suku ida bá suku seluk.

Kondisaun Estrada hosi Gleno bá Postu Administrativu Letefoho, tun to’o Postu Administrativu Atsabe, Sesta (09/02/2023). Foto/Cipriano Colo.

Deputadu bankada Marcos Martins hosi bankada CNRT hateten, iha fim de semana bainhira halo viajen ka fiskalizasaun iha munisípiu ne’e, preokupasaun inan-aman nian maka asuntu estrada de’it.

Lee Mós: Motorista Sira “Halerik” Ho Kondisaun Estrada Gleno-Letefoho-Atsabe

“Tanba ne’e, husu Ministériu Obras Públika atu bele aselera projetu konstrusaun estrada hosi Gleno bá Ermera tuan. Hosi Humboe bá Letefoho no hosi Mertutu bá Hatulia A, nune’e bele responde bá ita nia inan-aman sira nia preokupasaun,” deputadu Marcos Martins levante iha intervensaun plenária, Tersa (06/02/24).

Iha fatin hanesan deputada Rosena Fatima Martins hosi bankada Partidu Demókratiku (PD) hato’o lamentasaun hanesan katak, povu Ermera iha tempu naruk nia laran preokupa ho estrada no ponte.

Nia dehan, Ermera hanesan munisipiu ida ne’ebé mak ho nia populasaun barak liu iha Timor Leste maibé ninia estrada aat liu munisipiu hotu.

Tanba ne’e maka nia husu bá Governu atu tau prioridade ba konstrusaun estrada iha munisipiu ne’e tanba populasaun terus liu.

“Iha mós preokupasaun ida iha Munisípiu Ermera ne’ebá, mota Gleno Aipelu  suku Talimoro sai ameasa boot bá populasaun no estudante sira nia atividade lorloron nian, liuliu bá estudante sira katak bainhira mota boot sira labele bá eskola,” deputada Rosena Fatima Martins hateten.

Deputada ne’e mós haktuir katak, problema hirak ne’e hato’o direta hosi xefe suku Tali-moru nian nune’e husu Ministériu Obras Públiku atu fó resposta imediata.

Nia esplika, ponte Aipelu sai hanesan ponte alternativa bá komunidade Ermera Vila Postu-Administrativu Hatulia B suku Talimoro aldeia Poetete Ponilala.

Ne’e duni, husu bá Ministériu Obras Públika atu haree ponte ne’e urjentemente atu fasilita lalais sira nia atividade loro-loron nian.

Kona-bá ne’e, Vise-Ministru Assuntu Parlamentár, Adérito da Costa Hugo hateten, IX Governu Konstitusionál tau importánsia bá asuntu infra-estrutura liu-liu estrada no ponte ne’ebé sai preokupasaun povu nian.

“Asuntu estrada ho ponte sira ne’e ami nafatin rejista katak, implementasaun projetu sira emerjénsia ne’e iha balun kategoria ida mais de millaun $5 iha prosesu implementasaun demora oitoan, tanba kestaun lei no regras sira ne’ebé iha, maibé ba sira ne’ebé  la to’o millaun $5 progresu iha terrenu iha hela atu bele fó resposta lalais bá kondisaun estrada no ponte sira,” nia hateten.

Nia mós informa katak, agora daudaun estrada ho ponte sira ne’ebé mak konitnua fó ameasa  bá populasaun nia atividade hakarak informa katak, Ministériu Obras Públiku (MOP) hamutuk ho Ministériu Planeamentu no Investimentu Estratéjia ho ADN hala’o hela levantamentu kontinua atu bele fó resposta, tanba tempu duni ona atu fó resposta direta iha terenu.

Jornalista Estajiária : Zita Menezes