Ramos-Horta Apresia Situasaun Seguransa Nasionál, Husu Governu Kontinua Kontrola Krime Organizadu

Hatutan.com, (08 Fevereiru 2024), Díli—Prezidente Repúblika (PR), José Ramos-Horta liu hosi sorumutu Konsellu Superiór Defeza no Seguransa (KSDS) hato’o apresiasaun bá situasaun seguransa nasionál no husu atu Governu hamutuk ho Instituisaun Defeza no Seguransa kontinua kontrola krime organizadu sira bá estabilidade nasionál.

PR Ramos-Horta akompaña PM Xanana responde jornalista sira iha Palásiu Prezidensiál, Kinta (04/01/2024). Foto/GPR

Primeiru Ministru (PM), Kay Rala Xanana Gusmão fó-sai asuntu ne’e hafoin enkontru KSDS, iha Palásiu Prezidensiál Nicolau Lobato Bairru-Pité, Kinta (08/02/2024).

Lee Mós: Ramos-Horta Halibur Hikas GAM-GAR Iha Palásiu Prezidensiál

Xanana dehan, ida-ne’e nu’udár primeira reuniaun KSDS bá tinan 2024 hamutuk ho Prezidente Repúblika, José Ramos-Horta ne’ebé ko’alia kona-bá asuntu seguransa.

Ne’e duni, nia dehan, Xefe Estadu fó apresiasaun bo’ot ida bá joven sira no responsável Grupu Arte Marsiais no Arte Rituál sira ne’ebé depois de hasai tiha desizaun suspende sira nia atividade komesa diminui no Xefe Estadu fó apresiasaun bo’ot tebes bainhira selebra hamutuk tempu Natál nian, to’o Tinan Foun remata no ikus fali mai mós la akontese buat ida.

Xanana afirma katak, Prezidente Repúblika fiar joven sira nia partisipasaun ne’ebé ho konsiénsia tebes halo sosiedade bele hanoin daudaun ona oinsá mak bele hadi’a rai ida-ne’e.

“Ami ko’alia kona-bá seguransa no apresiasaun ida-ne’e hosi ministériu no membru sira KSDS mós fó apresiasaun daudaun ona kona-bá seguransa nasionál nian, liu-liu haree krime organizadu, money loudry, tráfiku umanu no droga. Xefe Estadu husu atu ita hotu-hotu atensaun ba ida-ne’e,” Primeiru-Ministru, Kay Rala Xanana Gusmão hateten.

Membru sira Konsellu Superior Defeza no Seguransa (KSDS) hamutuk na’in 13 hala’o enkontru iha tinan 2024, iha Palásiu Prezidensiál Nicolau Lobato Bairru-Pité, Kinta (08/02/2024). Foto: Tomé da Silva.

Xefe Governu husu atu bainhira jornalista sira mak hatene karik dehan ema ruma konsumu droga no fa’an droga, fó hatene bá polísia no ministériu sira kompetente atu la’ós ba kaer baku so’e hela, maibé lori mai atu rezolve tiha kazu ne’e.

Xanana Gusmão mos informa katak iha enkontru KSDS ne’e ko’alia mós assuntu balun importante maibé sei la fó sai bá públiku.

Membru sira Konsellu Superior Defeza no Seguransa (KSDS) hamutuk 13 mak hanesan Primeiru-Ministru, Kay Rala Xanana Gusmão, Ministru Negósius Estranjeirus no Kooperasaun, Bendito dos Santos Freitas, Ministru Defeza, Contra-Almirante Donaciano do Rosário Gomes, Ministru Interior (MI) Francisco da Costa Guterres, Ministru Justisa (MJ), Amândio de Sá Benevides.

Iha mós Reprezentante PN Deputada Maria Terezinha da Silva Viegas, Mandati Dias Ximenes no Deputadu Duarte Nunes,  Xefe Estado Maior Generál das F-FDTL, Tenente-General Falur Rate Lack, Komandante Jerál PNTL, Komisáriu Jerál Henrique da Costa, Diretór Jeral Servisu Nasional Intelijensia (SNI), Longuinhos Monteiro, Júlio Tomas Pinto no Nuno Manuel Corvelo de Andrade Sarmento (Nomeadu hosi Prezidente Republika).

Jornalista: Vito Salvadór