Xanana Garante Seguransa Vizita Papa Francisco Mai Timor-Leste

Hatutan.com, (08 Fevereiru 2024), Díli- Primeiru-Ministru (PM) Kay Rala Xanana Gusmão garante situasaun seguransa nasionál iha vizita Papa Fancisco mai Timor-Leste ne’ebé tuir ajenda iha fulan-Agostu 2024.

Lee Mós: Konfirmadu, Tinan Ne’e Papa Francisco Vizita Timor-Leste

Xefe Governu hato’o asuntu ne’e ba jornalista sira hafoin partisipa iha enkontru Konsellu Superiór Defeza no Seguransa (KSDS) ne’ebé hala’o iha Palásiu Prezidensiál Nicolau Lobato, Díli, Kinta (08/02/2024).

Primeiru-Ministru (PM) Kay Rala Xanana Gusmão. Foto/Tome da Silva

“Ita ko’alia kona-bá ita-nia preparasaun atu simu Papa Francisco, ne’ebé hanesan ita hatene iha komisaun ida ne’ebé mai husi Vatikanu ko’alia mós ho komisaun ne’ebé Governu forma iha Timor no komisaun rua ne’e hala’o daudauk servisu balun no Papa Francisco sei mai iha fulan-Agostu, hanoin katak ita iha tempu naruk atu halo buat hotu ne’ebé komisaun dehan tenke halo ida-ne’e no halo ida-ne’ebá liu-liu tanba Papa Francisco idade ona,” lider karizmátiku ne’e hateten.

Xanana Gusmão informa Papa Francisco mai ne’e iha fatin haat kedas, vizita dahuluk sei ba iha Papua Nova-Guinea, Timor Leste, Singapura, no Jakarta. Tamba ne’e, Xefe Estadu husu ba Governu no husu bá membru KSDS atu buka koordena bá malu hodi prepara daudaun kondisaun sira liu-liu seguransa nian.

“Iha fulan-Maiu 2024, komisaun hosi Vatikanu sei mai tan, mai atu haree, ita halo ona saida relasiona ho Papa nia vizita mai Timor-Leste,” Xanana Gusmão informa.

Jornalista: Vito Salvadór