MS Sei Reativa Klínika Móvel Atu Fó Asisténsia Saúde To’o Área Remota

Hatutan.com, (16 Fevereiru 2024), Díli—Governu liuhosi Ministériu Saúde (MS) sei reativa hikas programa Klínika Móvel, nune’e pessoál saúde sira bele tun direta bá halo atendimentu saúde bá populasaun to’o iha área remota.

Ministra Saúde, Elia dos Reis Amaral.

Ministra Saúde, Elia dos Reis Amaral informa ona asuntu ne’e bá Vise-Primeiru Ministru no Ministru Koordenadór bá Assuntu Sosiais, Ministru Dezenvolvimentu Rurál no Abitasaun Komunitária, Mariano “Assanami” Sabino, iha Palásiu Governu-Dili, Sesta (16/02/2024).

Lee Mós: MS Sei Destaka Pesoál Saúde bá Postu Saúde Sira

“Ita nia komunidade hela iha fatin balun ne’ebé seidauk asesu bá fasilidade saúde. Tanba ne’e maka ami planeia atu reativa programa Klínika Movel. Sira sei tun ho kareta bá iha área sira ne’e,” Ministra Saúde hateten iha Palásiu Governu, Dili.

Tuir planu, iha fulan-marsu 2024, MS sei halo tán rekrutamentu bá pessoál saúde sira ho baze bá rezolusaun Governu nian oinsá bele lori pakote integradu saúde ne’ebé sei involve entidade hotu-hotu, liu-liu bá iha parte instituisaun kada ministériu nian hodi  foka oinsá lori servisu saúde bá iha komunidade.

“Ho ida ne’e maka, pessoál saúde voluntáriu ita sei halo rekrutamentu, provavelmente iha marsu nia laran, maibé seidauk bele determina data depende ekipa ne’e rasik. Ita sei koloka depende bá rezultadu hosi alokasaun primeira-faze depois ita sei hahú fali segunda faze,” Elia Amaral hateten.

Planu MS nian ida ne’e atu responde bá Planu Estratéjiku Dezenvolvimentu Nasionál (PEDN) 2011 to’o 2023 bá seitór saúde nian hosi tinan 2011 to’o 20230, kada sentru no postu saúde sira, tenke iha ona médiku espesiálista ida, médiku jerál ida, emfermeiru ka emferneira ida, ho saúde públiku ida.

Jornalista: Rogério Pereira Cárceres