Hatutan.com, (19 Fevereiru 2024), Díli—Parlamentu Nasionál (PN) preokupa ho oknum seguransa ne’ebé utiliza sala arma Estadu hodi hakanek sidadaun sivíl.
Tanba ne’e, deputadu sira husu bá Ministériu Públiku (MP) atu halo invetigasaun kle’an bá kazu foin lalais akontese iha área Likintai no prossesa tuir Lei.
Lee Mós: Komandu PNTL ho F-FDTL Forma Ekipa Hodi Investiga Kazu Tiru Membru Forsa Navál
“Atitude ne’ebé mak ita nia seguransa interna halo nafatin hodi halimar ho kro’at bá ita nia populasaun liu-liu bá joven sira, ha’u bele dehan iha Lei atu regula, nune’e husu Ministériu Públiku atu investiga ho kle’an didi’ak,” deputadu bankada KHUNTO Luis Roberto hateten iha PN, Segunda (19/02/24).
Luis Roberto husu ne’e tanba pessoál ida labele estraga fali instituisaun boot ida ne’ebé hanesan instituisaun seguransa nasaun ida nian.
Nia husu bá komandu PNTL no Ministériu Públiku atu kapasita membru PNTL sira hodi profisional liu tán iha atuasaun sira iha terrenu liuliu kona-bá oinsa utiliza arma ne’ebé loos.
“Labele utilizá arma tuir sira nia hakarak, sira labele halimar fali ho arma Estadu. Ida ne’e hanesan violasaun bá diretus umanus,” nia hateten.
Iha fatin hanesan deputadu Bankada CNRT, Natalino dos Santos triste tebes ho situaaun ida ne’ebé sempre mosu konfrontasaun entre sidadaun sira no mós komete hosi oknum balun hosi Forsa no Polisia ne’ebé sempre uza armas hodi halo atuasaun iha terenu.
“Lamenta tebes no presiza instituisaun PNTL atu haree lalais no regulariza depois atu halo invetigasaun bá kilat sira ne’ebé utiliza hosi membru sira,” nia husu.
Nia husu mós atu Komandu rua kontinua fó formasaun bá membru sira oinsá bele utiliza arma iha terrenu.
Deputadu ne’e konsidera utilizasaun arma hosi oknum seguransa sir abele hafoer instituisaun rua nia naran iha rai laran no mós rai liur.
Iha Domingu (18/02/2024), tuku-tolu, oras madrugada mosu kazu insidente ida iha área Taibessi-Likintae, Suku Lahanae Orientál, Postu Administrativu Verra Cruz, Munisípiu Díli, deskonfia involve hosi autór ida hanesan membru PNTL, hosi Unidade Espesiál Polisia (UEP), tiru kanek membru F-FDTL ida hosi Komponente Navál.
Jornalista Estajiária: Zita Menezes
