Xanana husu Profesór Kontratadu Ne’ebé Kontratu Remata Tuir Prosesu Rekrutamentu

Hatutan.com, (22 Fevereiru 2024), Díli- Primeiru-Ministru (PM), Kay Rala Xanana Gusmão husu bá profesór kontratadu ne’ebé kontratu remata  iha 31 fulan-Dezembru 2023, atu  tuir prosesu rekrutamentu ne’ebé Ministériu Edukasaun  loke tanba ne’e tuir regra Funsaun Públiku nian.

Lee Mós: Profesór Kontratadu Sira Hala’o Marxa Lori Foto Ministra Dulce Hakerek DEP

Profesór kontratadu sira halo marxa iha Díli, Segunda (22/01/2024). Foto/Elio dos Santos da Costa

Primeiru-Ministru Kay Rala Xanana Gusmão hateten bá jornalista sira iha Palásiu Prezidensiál, Kinta (22/02/2024). Nia hatutan, Profesór kontratadu sira ne’ebé mosu bei-beik iha Ministériu Edukasaun nia  hatene see mak iha kotuk.

Xanana afirma problema mak regra atu ba tama nu’udár funsionáriu kazuál ka kontratadu tenke tuir regra la’ós hatama de’it no Governu ida ne’e tama funsionáriu kazuál ne’e millar  no iha Gabinete Primeiru Ministru rasik ha’u husu imi halo saida, hatan dehan la hatene no bolu mai atu funsionáriu iha ne’e.

Xefe Governu  ne’e fó ezemplu, gabinete Prezidente Autoridade RAEOA  nian iha funsionáriu kazuál hamutuk 428, tanba ne’e mak bolu Rogério Lobato ema FRETILIN áa atu hadi’a buat ne’ebé ho objetivu b’ot liubá rai ne’e no povu, se la’e partidu ida nia mandatu besik remata bolu de’it hotu-hotu bá sai funsionáriu kazuál.

“Profesór sira ne’e ha’u hatene sira iha hela Ministériu Edukasaun nafatin, favór ida hein bá prosesu rekrutamentu profesór agora la’o hela tanba ida ne’e mak prosesu ne’ebé Ministériu Edukasaun iha. Tanba ne’e ha’u husu ba profesór ka manorin na’in sira atu bá iha Ministériu Edukasaun hodi hatene sira nia problema no karik Ministériu Edukasaun presiza profesór karik bele haree tuir regra atu bele sai manorin na’in,” Primeiru-Ministru Kay Rala Xanana Gusmão.

“Iha Marsu to’o Abríl ha’u sei la’o mak haree iha Ministériu balun ne’ebé la kumpre nia programa sei hasai governante ne’e tanba nia la serve atu ukun, tanba mai atu serbí la’ós mai atu hetan priviléjiu no la’o ho karreta estadu no iha tan seguransa,” Xanana informa.

Xefe Governu subliña violasaun ba regra barak ne’ebé agora ne’e nonu governu lakon tempu atu hadi’a no hamoos fo’er sira ne’ebé husik hela.

Jornalista: Vito Salvadór