Tinan-2 Liu Ona, PGR Alfonso Lopez Konfirma Nafatin Kazu Projetu Instalasaun Set-Top Box RTTL.E.P iha Prosesu Laran

Hatutan.com, (23 Fevereiru 2024), Díli- Ministériu Públiku (MP) liu hosi Prokuradór Jerál Repúblika (PGR, sigla portugés) Alfonso Lopez, Sesta (23/02/2024), konfirma katak kazu projetu instalasaun Set-top Box Radiu Televizaun Timot-Leste, Empreza Públiku (RTTL,E.P) iha hela prosesu laran.

Lee Mós: PGR Kontinua “Taka-Ibun” bá Kazu Set-top Box RTTL, E.P

PGR Alfonso Lopez hateten, Ministériu Públiku sempre halo akompañamentu bá kazu hotu-hotu, ne’ebé iha no kazu projetu instalasaun Set-Top Box RTTL.E.P iha hela prosesu nia laran.

Prokuradór Jerál Repúblika (PGR, sigla Portugés), Alfonso Lopes. Foto/Dok

“Dala barak PGR sempre ko’alia no ita akompaña mundu hotu-hotu, tantu iha país amigu sira, prokuradór jerál labele ko’alia arbiru no kazu iha hela faze investigasaun, ita labele ko’alia kona-ba konteúdu,” Alfonso Lopez hateten bá jornalista sira iha Palásiu Prezidensiál hafoin hasoru malu ho Prezidente Repúblika.

Iha loron 24 fulan-Juñu 2022, Komisaun Anti-Korrupsaun (CAC, sigla portugés) submete ona relatóriu investigasaun finál bá Ministériu Públiku (MP) kona-bá kazu  projetu instalasaun Set-top Box/dexodificador Rádiu Televizaun Timor Leste, Empreza Públiku (RTTL,E.P) ne’ebé CAC mós deskobre  iha indísiu fó prejuizu bá Estadu.

Konteúdu hosi relatóriu ne’e, CAC konsege identifika arguido sira, inklui prejuízu indireta no direta bá Estadu ho valór  liu US$60,000.00.

Tinan ida liu ona (fulan-Juñu 2022-2023) kazu ne’e pendente hela iha Ministériu Públiku tanba ne’e deskonfia Prokuradór Jerál Repúblika  (PGR), Alfonso Lopez “budu” prosesu kazu ne’e to’o agora la iha informasaun no laiha transparente bá públiku kona-bá kazu ne’ebé envolve arguido eis-Ministru Asuntu Parlamentár no Komunikasaun Sosiál (MAPKOMS), Francisco  Martins da Costa Pereira Jerónimo.

Bazeia bá rezultadu prova dokumentál no sasin hamutuk na’in-17, CAC konsege identifika arguido na’in-haat (4) ne’ebé envolve iha krime abuzu bá podér, partisipasaun ekonomia iha negósiu, konflitu  interese no burla agravada relasiona ho projetu instalasaun Set-top Box/dexodificador Rádiu Televizaun Timor Leste, Empreza Públiku (RTTL,E.P).

Jornalista : Vito Salvadór