Governu Aloka Millaun $12 bá Komisaun Altu Nivel Institusionál bá Vizita Papa Francisco

Hatutan.com, (28 Fevereiru 2024), Díli- Governu liuhosi reuniaun Konsellu Ministru, Kuarta (28/02/2024),  delibera atu autoriza despeza to’o millaun $12 hosi fundu kontinjénsia bá Komisaun Altu Nivel Institusionál bá vizita Sua Santidade Papa Francisco.

Lee Mós: Santa Sé Aprésia Preparasaun Timor-Leste Nian bá Vizita Papa Francisco

Xanana Gusmão entrega prenda hosi povu Timor Leste nian bá Papa Francisco iha Palásiu Apostóliku Santa Sé, Roma, iha loron 25 fulan-Agostu 2022. Foto/Dok.Media PR

Komunikadu bá Imprensa hosi Sorumutuk Konsellu Ministrus nian ne’ebé Hatutan.com asesu informa  Konsellu Ministru delibera atu autoriza despeza to’o montante millaun $12 hosi Fundu Kontinjénsia bá Komisaun Altu Nivel Institusionál bá vizita Sua Santidade Papa Francisco, hodi organiza atividade preparasaun bá vizita refere.

Konsellu Ministrus analiza mós aprezentasaun husi Ministru Administrasaun Estatál, Tomás do Rosário Cabral, kona-bá pontu situasaun hosi implementasaun kontratu públiku iha ámbitu projetu jestaun rezíduu sólidu urbanu iha Díli.

KM Delibera Ona hodi Autoriza Despeza Millaun $ 15 bá CET

Tuir projetu ne’ebé aprezenta husi Vise-Primeiru-Ministru, Ministru Koordenadór Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, Konsellu Ministrus delibera ona hodi autoriza despeza ho valór millaun $15 kona-ba atribuisaun subvensaun anuál ida bá Konferénsia Episkopál Timorense (CET, sigla portugés), ne’ebé sei ezekuta durante tinan 2024.

Subvensaun anuál bá CET  hala’o tuir akordu ne’ebé asina ona iha loron 14 fulan-Agostu 2015 entre Timor-Leste ho Santa Sé, nune’e mós Akordu-Kuadru ne’ebé asina ona iha loron 16 fulan-Juñu 2017 entre Governu ho CET, ne’ebé prevee kontribuisaun anuál ida, tuir disponibilidade finanseira husi Governu, ba atividade ho karater sosiál, edukativu no governu ekleziál Igreja Katólika nian.

Jornalista: Vito Salvadór